Lim PDP-Laban bet para mayor ng Maynila!

October 07, 2018
Alfredo S. Lim

SI dating Mayor Alfredo S. Lim ang opisyal na kandidato ng Partido Demokratiko Pilipino-Lakas ng Bayan (PDP-Laban) para alkalde sa lungsod ng Maynila sa darating na halalan sa 2019.

Ito ang idineklara mismo ni PDP-Laban president, Senator Aquilino ‘Koko’ Pimentel III sa kailan lamang ay ginanap na mass oath-taking ng may 7,000 miyembro at lider  ng partido ni Lim, ang KKK (Kapayapaan, Katarungan at Kaunlaran) sa Open Air Auditorium sa Luneta na dinaluhan ng PDP stalwarts na kinabibilangan nina dating PNP Chief at kasalukuyang Bureau of Corrections Director Ronaldo dela Rosa, Department of the Interior and Local Government Undersecretary Martin Dino at Makati Congressman Monsour del Rosario, na naghalinhinan sa pag-endorso kay Lim bilang kandidato sa pagka-mayor ng Maynila.

Sa nasabing pagtitipon ay pinuri ni Pimentel sa kanyang talumpati ang tagumpay ng ‘womb to tomb’ program na inumpisahan ni Lim ipatupad sa lungsod sa unang pag-upo nito bilang mayor ng Maynila mula 1992 hanggang 1998 at ito ay kanyang itinuloy at pinabuti pang lalo nang muli siyang maging alkalde mula 2007 hanggang 2013.

Ang nasabing program ay nagbigay ng libreng serbisyo para sa mahihirap, mula sa oras na ang isang tao ay nasa sinapupunan hanggang sa kamatayan. Tampok sa mga serbisyong ito ang pagtatag ni Lim ng libreng college education nang kanyang ipatayo ang City College of Manila (o Universidad de Manila) at ang paglalagay sa anim na distrito ng Maynila ng tig-isang ospital na nagbibigay ng mga libreng serbisyo medikal, admission, doktors at maging take-home medicines.

Ani Pimentel, kailangan ng administrasyon ni Pangulong Rodrigo Duterte ang isang behikulo upang ang mga lider nito ay maupo sa gobyerno at matulungan ang gobyerno na maipatupad ang mga programa nito.

‘Sa local, alam n’yo na kung sino ang manok natin at ‘yan ay walang iba kundi ang inyong dating mayor, Alfredo Lim,’ ani Pimentel, dahilan upang maghiyawan ang libu-libong dumalo sa okasyon, kung saan binanggit din ni Pimentel na si Lim ang uri ng kandidato na may solidong plano para sa lungsod at mga naninirahan dito.

Nagpapasalamat umano ang PDP-Laban kay Lim na siya umanong dahilan kung bakit ang nasabing partido ay naging mas malaki at malakas sa Maynila at aniya, ang mga miyembro ng KKK ang siya ngayong pundasyon ng PDP-Laban sa Maynila.

Samantala, sinabi naman ni Dino na kailangan ng gobyernong Duterte ang matindi at malakas na kaalyado pagdating sa pinaigting na kampanya laban sa lahat ng uri ng kriminalidad kung kaya’t kanilang ineendorso si Lim.

‘Marahil ay sabik na sabik na kayo sa katahimikang ibinigay ng taong ito. Ito na ang pagkakataon na maibalik natin ang  katinuan sa Maynila, maibalik ang katahimikan at mawala na ang mga kriminal at korapsyon,’ ani Dino.

Sa paghahayag ng suporta, inilarawan naman ni Dela Rosa si Lim bilang isang ‘legend and an icon’ laluna sa hanay ng mga miyembro ng pulisya na kagaya niya.  Nakaka-identify umano siya kay Lim, na isang retired major general na naggugol ng 38 taon ng kanyang buhay sa police service.

Ayon kay Dela Rosa, pareho sila ni Lim pagdating sa matigas na paninindigan laban sa mga kriminal at gayundin sa kanyang walang katapusang pagsisikap na protektahan ang nga inosenteng sibilyan na nabibiktima ng masasamang-loob.

‘Napakagaling na idol ng lahat.  Walang pulis sa Pilipinas na di naging idolo ang ating mahal na mayor pero may kaunti kaming pagkakaiba sa pagiging pulis dahil siya ay pulis sa siyudad at ako naman ay pulis sa probinsya. Pero ‘yung galit sa mga kriminal at ‘yung awa sa mga taong kinakawawa ay pareho lang po kami,” ani Dela Rosa.

Sa kanyang banda ay nanawagan naman si Del Rosario sa libu-libong supporters ni Lim na tumulong nang husto upang maibalik si Lim -- na kanyang inilarawan bilang ‘walang kupas na idolo’ at ‘action man’- bilang alkalde ng Maynila, kasabay ng pagbanggit na ang may pruweba nang mga programa ni Lim para sa mahihirap ay kasama na sa mga dahilan kung bakit nila suportado ang kandidatura ni Lim.