TINULIGSA ng mga abogado ni Willie Revillame ang pagtanggi ng Movie and Television Review and Classification Board (MTRCB) na madinig ang panig ng TV host at ng kanyang WilProductions, Inc. sa nakaraang hearing kaugnay ng isyu kay “Jan-jan.”

Ayon kay Atty. Leonard de Vera, hindi nabigyan ng due process of law si Revillame at ang Wil Productions nang tumanggi ang MTRCB na pakinggan sila dahil hindi sila umano “nakarehistro” sa MTRCB.

Binigyang-diin ni De Vera na kung naging bukas lang ang isip ng mga taga-MTRCB  ay naipresenta sana ni Revillame ang mga ebidensya na ini-edit at pinagkabit-kabit ang mga video ng pagsasayaw ni Jan-jan sa youtube at facebook para palabasin na ito ay umiiyak sa kabuuan ng kanyang pagsasayaw.

Ang malisyosong editing ay taliwas sa tunay na mga pangyayari noong Marso 12 kung saan ay mapapanood sa unedited video na naging emosyunal ang anim-na-taong gulang na si Jan-jan sa pagpapasalamat sa kanyang mga magulang sa pagpayag na sumali siya sa Wiltime Bigtime segment ng show, anang abogado.

Idinagdag pa ni De Vera na ang “body wave” na isinayaw ni Jan-jan ay popular at walang bahid malisya, taliwas sa mga sinasabi ng ilang kritiko, gayundin ay walang masama sa mga komentaryo ni Revillame tungkol sa performance ng bata.

Bilang komedyante, ang interaksyon ni Revillame kay Jan-jan at sa lahat ng kanyang contestants at audience ay naglalayong makakuha ng sinserong reaksyon, partikular sa mga problemang kanilang kinakaharap at kung papaano mahaharap ang mga ito nang may ngiti sa mga labi.

Nilinaw ni De Vera na hindi maaaring hadlangan ng MTRCB ang artistic expression ni Revillame dahil ito ay protektado ng Bill of Rights, kung saan ay nakasulat na “No law shall be passed abridging the freedom of speech, of expression xxx.”

Ang pagbabawal kay Revillame na bigyang-laya ang kanyang “comic timing and interacting with the audience to elicit honest emotions (either empathy or laughter) constitutes prior restraint or censorship, which violates Willie’s freedom of expression,” ani De Vera.

“Revillame’s spiels, as a comedic host, are dictated by the crowd’s response to a performance. It is Willie’s talent to interact and respond to the audience --  to make the most out of hilarious situations and to empathize to sincere emotions.”