Nagkatawanan sa presscon ng Won’t Last a Day Without You last Saturday nang matanong si Sarah Geronimo kung papayag ba siya sakaling si Angeline Quinto ang mapiling kumanta ng theme song ng nasabing movie nila ni Gerald Anderson.

Pati si Sarah ay natawa na lang dahil noon pa naman nila nasagot pareho ni Angeline na okay naman silang dalawa at walang rivalry sa pagitan nila.

“Wala pong problema sa akin kung si Angeline man ang pagawain ng theme song, mahal na mahal ko ’yang si Angeline kaya wala po talagang problema. At saka, huwag na po nating gawan ng issue,” natatawa niyang sagot.

Sa pelikula ay ginagampanan ni Sarah ang role ng isang DJ na nagho-host ng isang love counseling radio program. Kakaibang-kakaiba raw ang role niya sa mga dati na niyang nagampanan dahil kung dati ay madalas siyang gumanap ng karakter na ‘no boyfriend since birth,’ this time sa Won’t Last a Day Without You ay sobra siyang broken hearted sa pag-ibig kaya ayaw na niyang magtiwala at magmahal.

Aminado naman si Sarah na naka-relate siya sa role niya ngayon dahil hindi naman daw lingid sa lahat ang pinagdaanan niya sa pag-ibig.

Pero thankfully ay nalagpasan na raw niya ang stage na ’yun at ngayon ay naka-move-on na.

Ang pagkakaiba nga lang daw niya kay DJ Heidee (her character in the movie), mas malalim daw ang pain nito since five years ang dinaanan nitong relationship  at hindi katulad niya in real life na sa Skype lang.

* * *

Ayon kay Coco Martin, natutuwa raw siya sa leading lady niyang si Angeline Quinto dahil kahit first acting project nito ang movie nilang You Light Up My Life ay nakikita niyang may ibubuga raw ang dalaga pagdating sa pag-arte.

“Honestly, nu’ng nagwo-workshop kami, para siyang… zero. Wala pa, wala pa siyang alam about the blocking, everything.

“Pero everyday, habang nagsu-shooting kami, doon ako nagugulat sa kanya kasi palalim siya nang palalim. Siguro dahil malalim ang pinaghuhugutan.

“Ang galing, eh. Kasi mayroon kaming mga eksena na mga drama, nagugulat kami. Kaya sabi ko nga kay Direk, ‘Direk, parang niloloko lang tayo nito na sinasabing wala siyang nalalaman pero sinu-surprise lang tayo’, kasi totoo ’yung binibigay niya, eh.

“And then, nae-excite kami dahil everyday, natututo siya at palalim siya nang palalim bilang artista,” papuri ni Coco kay Angeline.

Pero ang tanong, nanliligaw na ba siya kay Angeline?

“Hindi pa naman,” nakangiti at nahihiyang sagot ni Coco.

Natawa na lang ang aktor nang kantiyawan siya na mukhang may plano siya in the future dahil sa sagot niyang “hindi pa.”

Idinagdag din niyang sobrang busy rin ni Angeline ngayon at sa nakikita niya ay sobrang focused sa trabaho.

“Parang nakikita ko nga ang sarili ko sa kanya noong nag-i-start ako na halos hindi mo siya makausap,” he said.

Natutuwa lang daw siyang tingnan si Angeline na nag-e-enjoy sa trabaho kaya hinahayaan na lang daw muna niya ito.

“Basta ako, siyempre, gina-guide ko rin siya at sinusuportahan ko siya,” say pa ni Coco.