NAKIKIPAGLABAN ngayon kay Kamatayan ang isang lalaki makaraang pagbabarilin ng ’di pa kilalang salarin habang natutulog sa kanyang bahay kahapon sa lungsod ng Pasay.

Si Paulito Caparas, 43, ng Block 2, Lot-8, Gladiola St., Maricaban, Pasay City, ay agad na isinugod sa San Juan de Dios Hospital bunga ng tama ng bala sa mukha, leeg at palad.

Mabilis namang nakatakas ang suspek.

Batay sa imbestigasyon ni SPO1 Nestor Rubel ng Station Investigation and Detective Management Section (SIDMS), ang insidente ay naganap alas-2:15 ng madaling araw sa loob ng bahay ng biktima.

Ayon sa ulat, mahimbing na natutulog ang biktima malapit sa bintana nang dumating ang suspek at iniumang sa ulo ang baril nito.

Nang maalimpungatan si Caparas dahil sa kaluskos sa bintana, kinalabit ng makailang ulit ng suspek ang gatilyo ng baril. Agad namang isinugod ni Russel ang ama sa pagamutan nang makita itong tumimbuwang sa sahig.

Patuloy na inaalam ng mga otoridad kung ano ang motibo ng pamamaril.