PATULOY  na nakakalbo ang mga kagubatan ng mga watershed ng Bulacan ngayong panahon ng tag-araw hindi lamang dulot ng illegal logging kundi dulot na rin nang patuloy na pagkakaingin sa loob nito.

Kamakailan, isang forest fire ang lumamon sa may 10 ektaryang kagubatan sa loob ng Ipo Watershed ang na-monitor ng Pamahalaang Panlalawigan ng Bulacan.

Kinumpirma ni Bulacan Governor Wilhelmino Sy Alvarado ang nasabing report na iniulat ni Atty. Teddy de Belen, na personal na sumakay sa isang helicopter para i-monitor ang kalagayan ng mga kagubatan sa loob ng Ipo Watershed.

Ayon kay De Belen, tinatayang 40 hanggang 50 na mga kaingin na bagong sunog, na may average size na limang ektarya ang bawat isa, ang na-monitor nila sa loob ng nasabing watershed, bukod pa sa may 10 ektarya ng kagubatan na naglalagablab ang kanilang personal na nasaksihan sa Barangay San Mateo sa bayan ng Norzagaray.

Tinatayang 70 porsiyento na ng 6,600 ektaryang Ipo Watershed ang nakalbo na ang kagubatan dulot ng illegal logging, pag-uuling at pagkakaingin.

Nauna rito, sinabi rin ni Emmanuel Umali, manager ng watershed department ng Napocor, na may naganap ring forest fire nuong March 27 sa Sitio Suha, Barangay San Mateo sa bayan ng Norzagaray na nakapaloob sa Angat Watershed.

Idinagdag pa ni Umali na ang naapektuhang lugar ay isang reforestation project nila kung saan may apat na taon na ang idad ng mga punong kahoy duon.

Sinabi pa nito na may nagkaingin malapit sa nasabing lugar na posibleng pinagsimulan ng nasabing forest fire na agad naman na nirespundihan ng Forest Fire Quick Response Team ng Napocor.