Related Articles...
Featured Video
Adobe Flash Player not installed or older than 9.0.115!
| Preliminary investigation |
 |
 |
 |
| Tuesday, 09 February 2010 18:11 |
 DEAR Chief Acosta:Isang mahustisya at mapagpalang araw po. KGG. Atty. Persida, Magalang ko pong ipinababatid at ipinaaabot para po sa inyong kaalaman at kabatiran na nagpadala po ng subpoena ang prosecutor na humahawak ng aming kaso na ang layunin ay pagharapin ang magkabilang panig na itinakda sa ika-17 ng Disyembre 2009. Pinadala ang nasabing subpoena noong Disyembre 8, 2009 subalit natanggap lang namin noong hapon ng Disyembre 18, 2009, kung kaya’t hindi po kami nakadalo sa nasabing petsa ng paghaharap. Ang lubos po naming pinagtatakahan ay kung bakit nahuli ang pagdala sa amin ng liham gayung magkalapit bayan lamang po kami. Nagpapasalamat po kami sa layunin ng prosecutor sa kanyang naisin at layunin na magkaayos subalit hindi po namin nagustuhan ang kanyang ginawang pagsampa lamang ng kasong child abuse sa kalapastanganan at paninira ng dangal na inabot ng aking anak. Sapat na po ba ito para sa pang aabuso sa aking anak na 15 taong gulang lamang? Muli, ako ay lumalapit sa inyo na humihingi ng tulong sa inyong walang sawang pagtulong sa aking anak. Lubos na gumagalang, Gng. Jinky Gng. Jinky, Sa inyong sulat, nabanggit ninyo na kayo ay pinadalhan ng prosecutor na humahawak ng kaso ng iyong anak ng subpoena ngunit hindi nakarating ng maaga na naging dahilan ng hindi ninyo pagdalo sa tinakdang araw upang kayo ay magkaharap-harap ng inyong dinemanda sa tanggapan ng prosecutor. Ang tawag sa prosesong pagpapatawag ng mga magkakalabang partido sa isang kasong kriminal ay preliminary investigation na alinsunod sa pagbibigay ng patas na pagtingin ng batas (due process of law) na nasasaad sa Saligang Batas gayundin sa Rules of Court. Sa preliminary investigation ay bibigyan ng pagkakataon ang taong nademanda na sagutin ang demanda sa kanya. Dito din ay paghaharapin ang magkabilang partido upang mag-usap at bigyang linaw kung ang mga pagpapahayag ng complainant ay tama at wasto ayon sa nangyari. Matapos ay susuriin ng prosecutor kung may sapat na batayan ang reklamo at kung kanyang isasampa ang kaso sa hukuman upang litisin ng tuluyan ang taong nasasakdal. Sa kanyang pagsusuri ay titingnan kung sapat ang mga pagpapahayag ng complainant at kung sa palagay ng prosecutor ay merong sapat na batayan upang isampa ang kaso. Hinggil naman sa inyong tanong kung wasto ang kasong child abuse, dahilan sa hindi sinasadyang pangyayari na hindi kayo nakadalo sa preliminary investigation. Walang magagawa ang prosecutor kundi ibatay ang kanyang desisyon base sa sinumpaang salaysay ninyo. Sa madaling salita, ang kaso ay nakadepende kung gaano kalinaw ang naging salaysay ninyo o ng inyong anak sa sinumpaang salaysay, sa mga ebidensyang kalakip sa inyong reklamo at sa mga ebidensyang binigay o isinumite ng inyong kinasuhan. Marahil, sa pagtimbang ng prosecutor sa lahat ng edibensya, ay kanyang nakita na may wastong batayan ang reklamo upang isampa lamang ang kasong child abuse ngunit walang sapat na ebidensya upang maisampa ang iba pang kaso gaya ng physical injuries, rape o acts of lasciviousness laban sa inyong dinemanda. Maaari ninyong lapitan at kausapin ang prosecutor na may hawak ng inyong kaso upang ipaliwanag ang kadahilanan kung bakit hindi kayo nakarating sa araw ng paghaharap at pakiusapan na kanyang isama sa demanda ang iba pang kaso na nauna, na hindi naging malinaw sa kanya. Nawa ay malinaw naming nasagot ang inyong mga katanungan. Gayunpaman, binibigyang-linaw po namin na ang mga payong nakasaad sa liham na ito ay base lamang sa mga impormasyong nilalaman ng inyong liham at aming interpretasyon dito. Maaaring may ibang legal na opinyon na mas angkop dito kung may mga importanteng detalye na hindi ninyo nabanggit sa inyong liham. Mas makabubuting kayo ay personal na sumangguni sa isang abogado upang mas malinaw ninyong mailahad ang inyong sitwasyon nang sa gayon ay mapayuhan kayo ng mga hakbang na nararapat ninyong gawin. Ang inyo pong lingkod-bayan, PERSIDA V. RUEDA-ACOSTA Punong Manananggol Pambayan Paunawa: Ang mga serbisyong legal ng PAO gaya ng legal advise, court representation, pagsasagawa ng dokumento, notary at iba pa ay libre at walang bayad mula sa kliyente ng PAO sangayon sa R.A. 9406 o PAO Law. Sangayon din sa nasabing batas, ang katunggali o kalaban sa kaso kung matalo ang magbabayad ng atttorney’s fee sa PAO para ideposito sa National Treasury. Maaaring isumbong kay Chief Acosta ang sinumang empleyado o PAO attorney na manghihingi o tatanggap ng salapi mula sa kliyente ng PAO sa address na 5th floor, DOJ Agencies, NIA road corner East Avenue, Diliman, Quezon City, 1100. Makinig sa “Abogado ng Bayan” sa Radyo ng Bayan, DZRB, 738 khz. am band, 5:30-5:40 a.m. at sa “Abogado ng Bayan sa Radyo Magazine” 1278 khz am band 6:45-6:55 a.m. mula Lunes hanggang Biyernes. Isangguni ang iba pa ninyong usaping legal sa aming opisina sa address na nakasaad sa pitak na ito. O, kaya ay ipadala ang inyong katanungan sa aming e-mail address: This e-mail address is being protected from spambots. You need JavaScript enabled to view it . |
Most Popular Articles
- Tawak ( 7,616 views )
- Jason ng ‘PBB Double Up’ naglayas! ( 3,506 views )
- ‘Lupang Hinirang’ ni Arnel, kinapos! ( 2,761 views )
- Advertise ( 2,162 views )
- Bad news about Nora ( 2,002 views )