Kgg. na Atty. Acosta,

Magandang araw po. Gusto ko pong magbenta ng property na hulugan sa paraang ako ay may security o masisiguro ko na magbabayad ang aking binentahan. Anu-ano po ang mga kailangan na dokumento para sa transaksyong ito? Sana po ay matulungan ninyo ako. Maraming salamat po.


Lubos na gumagalang,

Bomby


Dear Bomby,

Hindi po ninyo nabanggit kung anong uri ng property ang inyong binabalak na ibenta. Dahil dito ay general lamang din po ang  payo na aming maibibigay sa inyo. Kung nais po ninyong magbenta ng property na hulugan o installment basis, mainam na kayo at ang inyong pagbebentahan ay mag-execute ng Deed of Conditional Sale. Ang nasabing dokumento ay magsasaad ng mga kondisyon ng inyong transaksyon, kasama na ang kondisyon na malilipat lamang ang pag-aari o ownership ng inyong ibinebentang property sa inyong pinagbentahan kung nabayaran na niya ang buong halaga na inyong pinagkasunduan.

Pagkatapos pong mag-comply ng inyong pinagbentahan sa mga kondisyon ng inyong bentahan ay saka lamang kayo mag-e-execute ng  Deed of Absolute Sale na nagsasalin sa kanya ng pag-aari o ownership ng property na inyong ibinenta. Maaari po kayong magpatulong sa isang notaryo publiko sa paggawa ng mga nabanggit na dokumento. Patungkol naman po sa kagustuhan ninyong matiyak na kayo ay mababayaran, maaari po ninyong isama sa mga kondisyon ang pag-i-isyu ng post-dated checks (PDCs) ng inyong pinagbentahan bilang kanyang bayad. Sa paraang ito, pwede po ninyo siyang panagutin sa batas sakaling tumalbog o hindi mapondohan ang mga PDCs. Ang mga PDCs ang magsisilbing inyong security.

Nawa ay malinaw naming nasagot ang inyong mga katanungan. Maraming salamat po sa inyong patuloy na pagtitiwala.


Ang inyo pong lingkod-bayan,

PERSIDA V. RUEDA-ACOSTA
Punong Manananggol Pambayan


Paunawa:

Manood ng “Public Atorni” araw-araw mula Lunes hanggang Biyernes sa ganap na 5  ng hapon  sa TV5.