Kgg. na Atty. Acosta,

Nais ko pong humingi ng payong legal hinggil sa pagbili ng lupa ng aking kapatid. Ang aking kapatid ay isang dating natural-born citizen ng Pilipinas na ngayon ay isa nang British citizen. Hindi po siya dual citizen ng dalawang bansang nabanggit. Gusto ko lang pong malaman kung maaari po ba siyang makabili ng lupa’t bahay na may sukat na 105 sq. meters sa Maynila.


Lubos na gumagalang,


Vito


Dear Vito,

Ang mga sumusunod na probisyon ng ating Saligang Batas ang may kinalaman tungkol sa karapatan ng isang dating natural-born citizen na magkaroon ng lupa sa ating bansa.

“Sec. 7. Save in cases of hereditary succession, no private lands shall be transferred or conveyed except to individuals, corporations, or associations qualified to acquire or hold lands of the public domain.

“Sec. 8. Notwithstanding the provisions of Section 7 of this Article, a natural-born citizen of the Philippines who has lost his Philippine citizenship may be a transferee of private lands, subject to limitations provided by law.” (Emphasis supplied)

Gayundin, ang Section 2 ng Batas Pambansa 185 ay nagsasaad na:

“Sec. 2. Any natural-born citizen of the Philippines who has lost his Philippine citizenship and who has the legal capacity to enter into a contract under Philippine laws may be a transferee of a private land up to a maximum area of one thousand square meters, in the case of urban land, or one hectare in the case of rural land, to be used by him as his residence. In the case of married couples, one of them may avail of the privilege herein granted; Provided, That if both shall avail of the same, the total area acquired shall not exceed the maximum herein fixed.

In case the transferee already owns urban or rural lands for residential purposes, he shall still be entitled to be a transferee of an additional urban or rural lands for residential purposes which, when added to those already owned by him, shall not exceed the maximum areas herein authorized.”

Ayon sa nasabing probisyon ng ating Saligang Batas, kung ang isang tao ay natural-born citizen ng Pilipinas  at naging citizen na ng ibang bansa, maaari pa rin siyang makabili ng pribadong lupa sa Pilipinas.

Subalit ang karapatang ito ay may mga limitasyon. Ang mga limitasyong ito ay nasasaad sa Batas Pambansa 185.  Ayon sa nasabing batas, ang mga dating natural-born citizen ay maaari lamang makabili ng pribadong lupa na hindi hihigit sa isang ektarya kung ito ay rural land at isang libong metro kwadrado kung ito ay urban land at  gagamitin niya bilang kanyang tirahan. Samakatuwid, maaari pong makabili ang inyong kapatid ng lupa sa Maynila na may sukat na 105 metro kwadrado.

Nawa ay malinaw naming nasagot ang inyong mga katanungan.

Maraming salamat po sa inyong patuloy na pagtitiwala.


Ang inyo pong lingkod- bayan,


PERSIDA V. RUEDA-ACOSTA
Punong Manananggol Pambayan