KUNG may mga pulis na nakagagawa ng hindi tama, mabilis ang pagpuna at pagtuligsa natin sa mga tiwali at hindi tamang asal ng sino mang pulis.  Katakut-takot na alimura at paglait ang ginagawa sa lahat ng pulis na tila ba sa kasalanan nung ilan ay idinaramay na pati ang mga walang ginagawang masama at matapat sa pagtupad ng tungkuling nakaatang sa kanilang mga balikat!

Mahigit na 120,000 ang pulis na tagapangalaga ng kaayusang pambayan at kaligtasan ng halos 90 milyon na yatang mga Pilipino, bukod pa ang mga dayuhang nasa ating bansa.  Hindi biro ang bigat ng saguting pasan ng mga pulis, ano po?  Sa totoo lang, marahil karamihan sa atin ay hindi nag-uukol ng pansin sa katotohanang sa ilalim ng ating mga batas, ang pangunahing katungkulan at sagutin ng mga pulis ay pangalagaan ang katahimikan at kaayusang pambayan.

Sa maikling salita, ang tungkuling nakaatang sa balikat ng mga pulis ay tiyakin ang katiwasayan sa lahat ng sulok ng bansa, pati sa mga pinakadulo at pinakaliblib na mga pook para ang bawa’t mamamayan ay mahimbing na makatulog nang walang agam-agam at malaya namang makapaghanap-buhay nang marangal.  Kasi nga, ang katahimikan at kaayusang pambayan saan mang sulok ng daigdig ang tunay na hagdang paakyat sa pagsulong ng kabuhayan ng taong bayan na tiyak na hahantong sa kaunlaran at kasaganaan ng isang bayan.

Kung maligalig at maraming masasamang-loob saan mang pook, tiyak na mag-aatubiling pumunta roon  ang sino man sa pangambang mapagnakawan o maputi pa ang buhay.  Ang ligalig sa isang pook ang dahilan kaya nga walang maaasahang pagsulong at pag-unlad ng kabuhayan ng mga tao.  At sa pagkakataon na gaya nito napapatunayan ang halaga ng husay ng mga pulis na siyang nangunguna sa pagharap sa mga naghahasik ng ligalig at kaguluhan saan mang panig ng bansa.  Subok naman ang husay ng mga pulis sa bayan natin.  Sa mga tauhan ng gobyerno, ang mga pulis ang unang-unang inaasahang lulunas sa mga problemang ukol sa katiwasayang pambayan, lalo na sa panahong ito na higit na mapangahas at tila mandin wala nang kinasisindakan ang masasamang-loob!

Totoo nga sa hanay ng mga pulis ang kawikaang: SA ISANG PUGARANG ITLOG, HINDI NAWAWALAN NG BUGOK!  Sa hanay ng mahigit na 120,000 pulis, mangilan-ngilan lamang ang nasa lihis na landas.  Ang higit na maraming pulis ay nasa tuwid na landas at handang ialay pati sariling buhay sa tungkuling sinumpaan.  Ang mabubuting alagad ng batas na ito ang nagbabantay upang tiyaking ligtas ang taong bayan sa lahat ng saglit nang hindi alintana ang sarili nilang kaligtasan o sukdulang Pasko o Bagong Taon at iba pang mahahalagang pagdiriwang ay wala sila sa piling ng mga mahal sa buhay sapagkat may tungkulin silang ginagampanan para sa sambayanan.

Kapag nakakita tayo ng pulis, lalo na ang sa kainitan ng sikat ng araw ay nagtatrapik para maayos na makadaloy ang mga sasakyan, sana, matutuhan nating pahalagahan ang kanilang pagpapakasakit sa kapakanang panlahat kahit may mangilan-ngilan sa hanay nila na nagiging batik pati sa matatapat, masisipag at matatapang na pulis na handang sumagupa sa mga kalaban ng katahimikan at kaayusang pambayan.