Halos isang araw lang pinirmahan ng magigiting na mga kongresista ang impeachment laban kay Supreme Court Chief Justice Renato Corona nang nakaraang Disyembre. Ok lang ‘yon!

Pero ang patuloy na walang tigil na pagtaas ng presyo ng gasoline, diesel at kerosene ay isa na ring inhustisya na matagal nang nagpapahirap sa mga Pilipino. Hindi ok ‘yon!

Tumindi na ang mga sunod-sunod na pagtaas ng presyo ng mga produktong petrolyo noon pa mang nakaraang siyam na taong panunungkulan ni dating Pangulong Gloria Arroyo.

Nitong nakaraang isa’t kalahating taong pagkakaupo ni P-Noy, patuloy pa ring humahagupit sa pagtaas ng presyo ang gasolina at diesel! Lalo pa itong tumindi nang magbangayan na sina P-Noy at CJ Corona ng huling bahagi ng 2011.

Aba’y pagpasok ng Enero ng taong ito, P2.50 ang idinagdag sa presyo ng gasolina at diesel! Nangyari ito nang magkasunod lang na dalawang linggo ng Enero! Anak ng putakte talaga!

Ang pagtataas ng presyo ay kasabay ng impeachment ni CJ Corona. Para bang interesado ang lahat ng Pinoy sa  impeachment  at walang makapapansin sa gagawin ng mga dambuhalang kumpanya ng langis sa pagtataas nila ng presyo ng mga produktong petrolyo.

Ang bilis ng mga mambabatas na pirmahan ang impeachment laban kay Corona pero hanggang  ngayon nakabimbin pa rin ang panukalang batas ng Bayan Muna party list sa Oil Regulation Law para maibasura na ang Oil Deregulation Law o RA. 8479 na ginawang batas noong 1998

Dapat nang isabatas ang Oil Regulation Law mga Cong! Para kayong naka-100% high octane gasoline sa paglagda sa impeachment pero bakit naman nagiging “diesel” kayo pagdating sa pagsasabatas ng Oil Regulation Law na magpapagaan sa buhay ng 80 milyong Pilipino.

Para naman hindi masabing pulitika lang ang habol dyan sa impeachment, makabubuti marahil na isabatas na ngayon din ang Oil Regulation Law ng mga pumirmang 188  kongresista sa impeachment ni Corona.

Tiyak bayani kayo at puputungan kayo sa ulo ng korona ng mamamayang Pilipino bilang pagbubunyi --- kung ito’y gagawin n’yo.