Kgg. na Atty. Acosta,

Nais ko pong humingi ng payong legal hinggil sa donasyon ng lupa. Ang amin pong lolo ay nag-donate ng isang hektaryang lupa sa isang paaralan noon pang dekada singkwenta na tinayuan ng isang gusaling pampaaralan. Ang nasabing lupa ay inabandona na ng paaralan sa dahilang lumipat na ito sa isang lupa na ibinigay din ng iba naming kamag-anak. Gusto po naming malaman kung may karapatan ba kaming bawiin ang lupang ito?

Maraming salamat po.

Lubos na gumagalang,

Hermogenes


Dear Hermogenes,

Ang isang donasyon ay maaaring mapawalang-bisa kung ang donor ay may ipinataw na kondisyon sa donee noong panahon ng pagkaka-donate ng isang pag-aari.

Ayon sa Article 764 ng Civil Code of the Philippines:

“Art. 764. The donation shall be revoked at the instance of the donor, when the donee fails to comply with any of the conditions which the former imposed upon the latter.

“In this case, the property donated shall be returned to the donor, the alienations made by the donee and the mortgages imposed thereon by him being void, with the limitations established, with regard to third persons, by the Mortgage Law and the Land Registration Laws.

“This action shall prescribe after four years from the noncompliance with the condition, may be transmitted to the heirs of the donor, and may be exercised against the donee’s heirs (647a)”.

Dahil wala kayong nabanggit sa inyong liham, ipinagpapalagay naming walang kaakibat na kondisyon ang pagkaka-donate ng inyong lolo sa nasabing lupa hinggil sa kung saan ito gagamitin. Dahil dito, maituturing na absolute o ganap ang pagkakabigay niya ng lupa sa paaralan. Samakatuwid, ang lupang ibinigay ng inyong lolo sa paaralan ay mananatiling kanila bagama’t hindi na nila ito ginagamit. Wala na kayong karapatan na bawiin ang nasabing lupa.

Nawa ay malinaw naming nasagot ang inyong mga katanungan. Gayunpaman, binibigyang-linaw po namin na ang mga payong nakasaad sa liham na ito ay base lamang sa mga impormasyong nilalaman ng inyong liham. Maaaring may ibang legal na opinyon na mas angkop dito kung may importanteng detalye na hindi ninyo nabanggit sa inyong liham.

Maraming salamat po sa inyong patuloy na pagtitiwala.


Ang inyo pong lingkod-bayan,


PERSIDA V. RUEDA-ACOSTA
Punong Manananggol Pambayan


Paunawa:

Ang mga serbisyong legal ng PAO gaya ng “legal advice,” court representation, pagsasagawa ng dokumento, notaryo at iba pa ay libre at walang bayad mula sa kliyente ng PAO sang-ayon sa R.A. 9406 (PAO Law). Sang-ayon din sa nasabing batas, ang katunggali o kalaban sa kaso na matatalo ang magbabayad ng attorney’s fee sa PAO para ideposito sa National Treasury.

Maaaring isumbong kay Chief Acosta ang sinumang public attorney o empleyado ng PAO na manghihingi o tatanggap ng salapi mula sa kliyente ng PAO sa address na ito: 5th Floor, DOJ Agencies Building, NIA Road corner East Avenue, Diliman, Quezon City, 1104.

Makinig sa “Abogado ng Bayan” sa Radyo ng Bayan, DZRB, 738 khz AM band, 6:30 a.m., mula Lunes hanggang Biyernes. Manood ng “Public Atorni”  tuwing Huwebes ng gabi sa TV5, before “Aksyon Journalismo”. Isangguni ang iba pa ninyong usaping legal sa aming opisina sa address na nakasaad sa pitak na ito o kaya ipadala ang inyong katanungan sa aming e-mail address: This e-mail address is being protected from spambots. You need JavaScript enabled to view it. o tumawag sa PAO hotline: 929-9436 anytime.