BAGO ang lahat, binabati natin ang mga miyembro ng Manila City Hall Reporters Association (MACHRA) sa pagtugon sa panawagan ni Mayor Alfredo Lim na tulungan ang mga biktima ni Typhoon Sendong sa Cagayan de Oro at Iligan City.

Ang MACHRA, na pinamumunuan ni kasamang Itchie Cabayan, ay nakalikom ng P15,000 na agarang ibinigay kay Mayor Lim na siya namang nag-turnover kay City Treasurer Marissa de Guzman.

Matatandaan na kinansela ni Lim ang nakatakdang New Year fireworks display noong nakaraang buwan sa Manila Bay at ibinigay na lang ang budget nito para sa mga biktima ni Sendong.

Tig-P1 milyon  ang pinadala ni Lim sa mga alkalde ng dalawang syudad sa Mindanao bilang tulong ng mga taga-Maynila.

Sa isang simpleng seremonya, pinasalamatan ni  kasamang Itchie ang lahat ng miyembro ng MACHRA  sa kanilang mabilis na pagtugon sa panawagan ni Mayor Lim. “We hope that this small gesture will snowball into greater help for our displaced countrymen in Cagayan de Oro and Iligan Cities,” dagdag pa  ni Cabayan.

Sa ginawang ito ng MACHRA, hindi lang galing sa pagsusulat at pagkuha ng balita ang kanilang pinatunayan. Ipinakita din nila na sa oras ng kagipitan  ay handang tumulong ang kanilang grupo sa abot ng kanilang makakaya para maibsan ang hirap na dinaranas ng mga apektadong kababayan.

Nahawa na yata ang MACHRA sa pagkamatulungin ni Mayor Lim, na isang dating senador at heneral. Hehehe.

Mabuhay ang MACHRA!

* * * *

Sa tuwing tataas ang presyo ng langis at iba pang produktong petrolyo sa pandaigdigang pamilihan ay tumataas din ang blood pressure ng marami nating kababayan.

Paanong hindi sila maha-highblood, grabe kasi kung magtaas ng presyo ang mga lokal na kompanya ng langis sa bansa.

Nagagawa nila ito dahil deregulated nga ang industriya ng langis sa Pilipinas.

Sa ilalim ng Oil Deregulation Law, nawawalan ng kapangyarihan ang gobyerno na magtakda ng presyo ng mga inaangkat na fossil fuel. Ang ibig sabihin nito ay pwedeng magtaas ng presyo ang mga kompanya ng langis kahit walang pahintulot ang gobyerno.

Dahil sa nakikitang paghihirap ng taumbayan,  nananawagan ang dalawang mambabatas na gumawa ng paraan ang gobyerno para maibsan ang impact ng oil price increases.

Gusto ni Zambales Rep. Mitos Magsaysay na pansamantalang bawasan ang ipinapataw na VAT sa mga produktong petrolyo.

Tama si Magsaysay dahil mabigat sa mga consumer ang binabayarang VAT. Hindi naman siguro babagsak ang ating ekonomiya kung pansamantalang isakripisyo muna ng gobyerno ang revenue collection nito.

Payag naman ang taumbayan na ibalik ang buong VAT kapag nag-normalize na ang presyo sa pandaigdigang merkado.

Kung si Anakpawis Rep. Rafael Mariano naman ang masusunod ay nais niyang  i-repeal na  ang nakabubuwisit na Oil Deregulation Law.

Pinuna ni Mariano ang kawalang aksyon ng Malakanyang sa ginagawang overpricing at profiteering ng mga kompanya ng langis.

Tinawag pa ni Mariano ang Malakanyang na “top patron” ng mga oil firms. Bilang negosyante, may karapatan ang mga may-ari ng mga kompanya ng langis na kumita pero huwag namang sakalin ang mahihirap.

Marami ang naniniwala na walang naluluging kompanya ng langis. Hindi naman siguro sila mababangkarote kung bawasan naman nila ang kanilang kinikita habang lugmok sa kahirapan ang marami nating kababayan.

Tama ba, Pangulong Aquino?

* * * *

MGA REKLAMO AT REAKSIYON

Tama po kayo. Ano ba ang matutunan ng bata sa apat na oras?  At pahirap po sa mga estudyante at magulang ang dalawang taong dagdag sa basic education system. Ang dapat nilang gawin ay dagdagan ang public school sa buong bansa para hindi nagsisiksikan ang mga bata sa classroom.

Paano kaya matuturuan ng guro ang mahigit 70 bata? ’Yan ang dahilan kaya nawawala  ang kalidad ng edukasyon. Tama, lalo lang dadami ang out-of-school youth -- JUAQUINA ACOSTAQ ng Nasugbu, Batangas.

Walang maidudulot na maganda ang K+12 at pagbawas ng oras ng Grade 1. Kaya Sec. Luistro, ang sigaw ng bayan,  mag-resign na kayo ng among si P-Noy dahil pulos pahirap ang ibinibigay niyo sa taumbayan -- RIC CABUSAO ng Manila.

Salamat sa text nina FLOR HERNANDEZ ng Laguna, DENNIS DE LEON ng Pasig, REMY  FELICIANO ng Pampanga, ALBERT JOAQUIN ng Laguna, MADELINE G. ng Muntinlupa, ALLAN QUE ng Makati, AMBOY LENISA ng Mandaluyong at HOMER REGINO ng Las Piñas.

(Para sa inyong komento at suhesityon, tumawag o mag-tex sa # 0915-9462777/email: This e-mail address is being protected from spambots. You need JavaScript enabled to view it. . Ilagay lang ang buong pangalan at tirahan.)