DAHIL sa kahusayan, kasipagan at dedikasyon sa trabaho ng kanyang mga opisyal, na pinangungunahan ni Mayor Strike B. Revilla, hindi na maawat ang mabilis na pag-unlad ng bayan ng Bacoor sa Cavite.

Sa totoo lang, pati ang DILG ay bilib sa kakayahan nina Mayor Revilla sa pagsulong ng  socio-economic development ng nasabing bayan sa kabila ng maraming mabibigat na problemang kinakaharap ang  bansa.

Kaya naman sa wakas ay iginawad din ng DILG sa Bacoor ang “seal of good housekeeping” bilang patunay na isinusulong ng munisipyo ang “transparency” at “accountability.”

Ibinibigay lang ng DILG ang nasabing parangal sa mga bayan, syudad at probinsiya “that exemplify good governance.”

Ito ay pagkilala rin sa “good planning and sound fiscal management” ng isang lokal na pamahalaan.

Ang DILG na pinamumunuan  ni Sec. Jesse Robredo, isang dating alkalde sa Bicol, ay regular na mino-monitor ang performance ng mga mayor at gobernador.

Naniniwala tayo na ang mga karangalan na tinatanggap ng Bacoor  ay nagsisilbing inspirasyon para lalong husayan nina Revilla ang kanilang panunungkulan sa mamamayan. Pero walang magagawa ang mga lingkod-bayan kung walang  suporta ang taumbayan.

Kaya naman dito nagpapasalamat si Mayor Strike at  mga lokal na opisyal dahil sa patuloy na pagsuporta at pakikiisa ng mga Bacooreno sa mga programa at proyekto ng munisipyo.

Dahil sa nakikitang sinseridad nina Mayor Revilla ay kusang-loob na tumutulong ang publiko, pati na ang mga ordinaryong mamamayan sa lokal na gobyerno.

Kaya para sa inyong mga taga-Bacoor, Mabuhay kayong lahat!

Teka muna, Sec. Robredo, baka naman matengga pa ang incentive na inaasahan ng bayan ng Bacoor? Huwag naman sana!

* * * *

Araw-araw ay laman ng mga pahayagan ang nalalapit na impeachment trial ni Supreme Court Chief Justice Renato Corona sa Senado.

Pati sa radio at telebisyon ay impeachment din ang paboritong tinatalakay sa mga talk shows.

Okay lang ito dahil talaga namang mainit na isyu ang pagtanggal sa isang mataas na opisyal ng gobyerno na kagaya ni Corona.

Pero mukhang naisasantabi ang mga problemang nagpapahirap sa mamamayan sa mahabang panahon .

Ito ang kahirapan, kawalan ng trabaho, kurapsyon, kataasan ng presyo ng bilihin , kakulangan ng tirahan at dumaraming out-of-school youth.

Hangga’t nandiyan ang kahirapan ay ‘di mawawala ang kurapsyon sa lipunan.

Kaysa pag-usapan ang mga programang makakatulong sa mga mahihirap, nakalulungkot na nakasentro ang ating atensiyon sa pagpapalayas kay Corona  sa Korte Suprema.

Lahat ay gustong sumakay sa isyu, lalo na ang mga nagbabalak na kumandidato sa isang taon.

Libreng publisidad nga naman kung makikisawsaw sila sa napakakontrobersiyal na impeachment trial.

Sana pabayaan na lang ang mga senador, prosecutor at taga-pagtanggol ni Corona na gawin ang kani-kanilang trabaho. At habang dinidinig ang kaso ay sikapin naman ng mga opisyal ng Malakanyang at magigiting na kongresista na  resolbahin ang mga problemang nangangailangan ng agarang aksyon.

Inuulit natin, mahalaga ang paghabol sa mga taong pinaghihinalaang nagsamantala noong nakaraang rehimen.

Pero huwag naman nating kalimutan ang paglaban sa kahirapan at kawalan ng trabaho.

Marami ang napipilitang magnakaw  para may pantustos sa araw-araw na pangangailangan ng kani-kanilang pamilya.

Maraming humihinto ng pag-aaral dahil imbes na pumasok sa paaralan ay gugustuhin pang magtulak ng kariton para lamang kumita ng pangtawid-gutom.

Kaya nga tanong ng marami nating kababayan: Magkakaroon ba ako ng trabaho kapag na-impeach si Corona? Bababa ba ang presyo ng bilihin kung masisipa si Corona?

Tanggal o hindi, ang sigurado ay nandiyan pa rin ang dumadaming bilang ng mga mahihirap na kababayan natin.

Kayo, ano sa tingin niyo?

MGA REKLAMO AT REAKSIYON

Hindi lang dapat Mindanao ang pinaghahandaan ng landslide ng PNP. Dapat ituon rin nila ang pansin sa Baguio City, kung saan nagkalat ang iskwater sa gilid ng bundok at ibang parte ng Mt. Province kung saan may minahan -- CALOY MANALASTAS ng Manila.

Piyesta na naman ang mga oil companies. Wala na namang pipigil sa mga gagawin nilang pagtaas ng produktong petrolyo dahil sa nangyayaring gulo sa Middle East -- ARNEL JIMENEZ ng Pasig.

Tuloy na ang impeachment, magtrabaho naman kayo diyan sa Malakanyang. Wala kayong ginawa kundi dumaldal -- ARNIE SISON ng Makati.

Salamat sa text nina ED SOTTO ng QC, NELLIE ONG ng Marikina, SYLVIA RODRIGUEZ ng Laguna, CECILLE MATIAS ng Pampanga, ADOR POLINTAN ng San Juan, BETH CRUZ ng Bulacan, BLEST ORDONEZ ng Las Piñas at ALEX CO ng Pasig.

(Para sa inyong komento at suhestiyon, tumawag o mag-texct sa 0915-9462777/email: This e-mail address is being protected from spambots. You need JavaScript enabled to view it. . Ilagay lang ang buong pangalan at tirahan.)