MAY suhol ba o ayaw lang magtrabaho ang mga kinauukulan upang magsagawa ng pag-iinspeksyon sa mga kilalang supermarket sa Metro Manila na patuloy na nagbebenta ng mga nangingitim na karne ng manok at baboy at bilasang isda sa kanilang mga ‘wet market section’.

Mapapansin din ang sobrang mura ng halaga ng mga ‘frozen meat products’ tulad ng mga karne ng baboy at manok na ibinebenta sa ating mga kababayan na karaniwan ay ‘buy-one-take one kilo free’ o ‘fifty percent discount’ ang bawat kilo nito na tila nais talagang ipaubos ang stock.

Sa mga supermarket  sa Lungsod ng Maynila at  sa may Macapagal Avenue sa Pasay City makikita ang mga tila nabubulok nang ‘frozen meat products’ at nangingitim na ang mga karne na ibinebenta nga sa napakamurag halaga.

Samantalang ang mga sobrang itim nang mga  karne na kung ilang buwan na sa kani-kanilang mga freezer ay pinuputol-putol at mina-marinate at nilalagyan ng kulay upang maitago ang nangingitim na kulay ng mga karne.

Ayon sa ilang mga mamimili, sobrang kapal din ng mga apog ng mga nangangasiwa sa mga ‘wet market’ ng nasabing mga ‘supermarket’ para lagyan ng salitang ‘fresh fish’ ang mga bilasa at namumutla nang mga hasang ng isdang kanilang ipinagbibili na nasa ibabaw ng mga yelo.

Lalu’t higit namakakapal ang mukha ng mga namamahala sa nasabing mga supermarket para linlangin ang publiko na ibenta bilang sariwa ang mga sugpo at hipon na naglalaglagan na ang mga ulo na isang palantandaan na hindi na sariwa ang mga ito.

At para sa kaalaman ng ating mga mamimili, ang itinitindang ‘frozen meat products’ sa atin sa nasabing mga supermarket ay mga imported na karamihan ay galing pa sa Tsina, Australia, New Zealand at Amerika na kung ilang buwan na sa mga  barko at ‘reefer vans’  bago mailabas ang mga ito sa Bureau of Customs.

sabi ng aking mga kakilala sa BOC, karamihan sa nasabing  mga imported na karne ng baboy, manok at baka ay noon pang buwan ng Septiembre at Oktubre nagsidating sa bansa at ang mga ito ang ibinebenta ngayon ng mga supermarket,

Karamihan din sa mga ‘frozen meat products’ na ito ay hindi dumaan sa pag-i-inspeksyon ng Bureau of Food and Drug (BFAD) at Bureau of Animal  Qurantine (BAQ) ng Depatment of Agriculture(DA) na nakabase sa mga ‘customs ports’bunga ng karamihan sa mga ‘reefer vans’ na kinalululanan ng mga ito ay naipuslit sa customs.

Nangangamba nga ang mga taga DA, BFAD at BAQ na sa dami ng nakalusot na karne ng baboy at manok sa customs na hindi nila na-inspeksyon ay maaaring marami dito ang mga ‘double-dead  o ‘imported botcha o kontamindo ng ‘foot-and-mouth-disease’ (FMD) na ginawang mga hamon  bago mag-Pasko.

Nangangamba din ang mga taga DA, BFAD at BAQ  na sa ’di malayong hinaharap ay matuklasang may iba’t-ibang uri ng mga sakit ang mararanasan ng ating mga kababayang nakabili at nakakain ng ‘imported botcha’ na pinroseso dito sa ating bayan bilang mga  hamon, hotdogs, longganisa at hamburger at iba pa.

Ilan umano sa mga sakit na maaaring ma-develop              sa mga nakakain ng             kontaminado at mga ‘imported botcha’ ay ang pagkaroon ng cancer sa buto, leukemia, sakit sa balat at marami pang ibang uri ng mga sakit.

Kaya bago makapamisala pa ang mga nagkalat na ‘over frozen meat products’ sa mga supermarket na patuloy na ibinebenta ng mga ito sa ating mga kababayan sa murang halaga, dapat magsagawa na ng pag-iinspeksyon ang mga taga DA, BFAD at BAQ at maging ang mga lokal                             na pamahalaan na nakakasakup sa mga ito.