Kgg. na Chief Acosta,

Tama po ba na napakalaki ng interes na pinapatong sa akin ng aking pinagkakautangan? May tatlong (3) taon ko na pong hindi ito nababayaran at ang sabi po ay 5% po kasi kada buwan ang interes na pinapatong nila sa aking utang. Makukulong po kaya ako kung hindi ko ito mabayaran?


Lubos na gumagalang,

Naty


Dear Naty,

Hindi malinaw sa amin kung ikaw ay mayroong pinirmahang kontrata hinggil sa inyong pagkakautang. Maaaring mayroong nakasulat doon hinggil sa pagtaas ng interes pagdating ng takdang panahon na hindi nababayaran ang pagkakautang.

Halimbawang walang nakasulat hinggil sa pagtaas ng interes, maaari mong linawin kung bakit nila nagawang itaas ang interes ng walang sapat na batayan o paglilinaw man lang. Hindi tama na agad ka nilang pagbayarin ng utang lalo na kung hindi malinaw kung ano ang naging batayan nila upang itaas ang interes at singilin ito.

Sa kasamaang-palad, halimbawang nakasulat sa inyong kontrata ang tungkol sa pagtataas ng interes sa pagdaan ng panahon ay kailangan ninyo itong bayaran. Ito ay sa kadahilanang ang kontrata ang siyang batas na gagabay sa inyong relasyon sang-ayon sa prinsipyo na contracts are law between the parties, and they are bound by its stipulations (Spouses Faustino and Josefina Garcia et. al. v. Court of Appeals, G.R. No. 172036, 23 April 2010).

Ang hindi ninyo pagbabayad ng simpleng utang at pagsampa ng kasong sibil sa hukuman ay hindi sapat na dahilan upang kayo ay makulong. Malinaw sa 1987 na Saligang Batas na, “No person shall be imprisoned for debt or non payment of a poll tax” (Section 20, Article III of the Bill of Rights, 1987 Philippine Constitution).

Hindi maituturing na estafa ang inyong sitwasyon dahil sa wala namang deceit o panloloko at hindi naman ninyo nais takbuhan ang inyong obligasyon. Sa katunayan, sinusubukan mo naman itong bayaran kasabay ng pakisuyo na bawasan ang malaking interes na ipinataw dito.

Nawa ay malinaw naming nasagot ang inyong mga katanungan. 


Ang inyo pong lingkod- bayan,

PERSIDA V. RUEDA-ACOSTA
Punong Manananggol Pambayan


Paunawa:

Ang mga serbisyong legal ng PAO gaya ng “legal advice,” court representation, pagsasagawa ng dokumento, notaryo at iba pa ay libre at walang bayad mula sa kliyente ng PAO sang-ayon sa R.A. 9406 (PAO Law). Sang-ayon din sa nasabing batas, ang katunggali o kalaban sa kaso na matatalo ang magbabayad ng attorney’s fee sa PAO para ideposito sa National Treasury.    

Maaaring isumbong kay Chief Acosta ang sinumang public attorney o empleyado ng PAO na manghihingi o tatanggap ng salapi mula sa kliyente ng PAO sa address na ito: 5th Floor, DOJ Agencies Building, NIA Road corner East Avenue, Diliman, Quezon City, 1104.

Makinig sa “Abogado ng Bayan” sa Radyo ng Bayan, DZRB, 738 khz AM band, 6:30 a.m. mula Lunes hanggang Biyernes. Manood ng “Public Atorni”  tuwing Huwebes ng gabi, sa TV5, before “Aksyon Journalismo”. Isangguni ang iba pa ninyong usaping legal sa aming opisina sa address na nakasaad sa pitak na ito o kaya ipadala ang inyong katanungan sa aming e-mail address: This e-mail address is being protected from spambots. You need JavaScript enabled to view it. o tumawag sa PAO hotline: 929-9436 anytime.

Ang mga serbisyong legal ng PAO gaya ng “legal advice,” court representation, pagsasagawa ng dokumento, notaryo at iba pa ay libre at walang bayad mula sa kliyente ng PAO sang-ayon sa R.A. 9406 (PAO Law). Sang-ayon din sa nasabing batas, ang katunggali o kalaban sa kaso na matatalo ang magbabayad ng attorney’s fee sa PAO para ideposito sa National Treasury.