NAIS kong pukawin ang mga pinuno ng Department of Health (DOH), Bureau of Food and Drugs Administration (BFAD), Department of Labor and Employment (DOLE) at Domestic Trade ng Department of Trade and Industry (DTI) kaugnay ng ‘poor working condition’, sanitasyon at mga paglabag sa mga alintuntunin ng pabrika ng patis at sardinas sa Navotas.

Ayon sa mga manggagawa, hindi masisikmura ng kahit sinong tao ang masangsang at nakapandidiring amoy at tanawin ng mga wala nilang pintong palikuran para sa mga babae at lalaking trabahador sa kanilang pagawaan.

Katabi ng maduming palikuran ay ang imbakan o imburnal ng ‘disposal waste’ ng factory na kung saan kadikit o nasa likod lang nito ang imbakan naman ng mga ‘frozen fish’ na ginagawang sardinas.

Nasabi din sa akin ng mga manggagawa doon na ang mga ulo ng isda na ginagawang patis mula sa mga pinutol na katawn ng isda na gagawing sardinas ay inilalalagay sa isang malaking imbudo na puro kalawang at kasama ang kalawang na pinatutulo sa isang malaking lalagyan ang mga katas ng ulo ng isda.

Hindi umano nagsasagawa ng pag-iinspeksyon ang  mga lokal na awtoridad at maging ng mga taga DOH-BFAD, DOLE at DTI sa nasabing pagawaan ng patis at sardinas na pag-aari ng isang umano’y Chinese national.

Hindi rin nakasisiguro ang mga bumibili ng produkto ng nasabing kumpanya kung malinis ba o hindi ang kanilang mga patis at sardinas na ikinakalat sa buong Metro Manila at buong kapuluan.

Kaya ang panawagan ng mga manggagawa sa nasabing kumpanya ay agad na magsagawa ng regular na pag-iinspeksyon ang mga awtoridad  sa iba ring pagawaan ng patis at sardinas sa lugar na maaaring lumalabag sa mga alintuntunin at regulasyon kaugnay ng maayos na paggawa at sanitasyon.

’Di naman lingid sa atin na maraming mga kababayan natin ang nalalason bunga ng marumi at kontaminadong mga pagkaing de-lata, kagaya ng nangyaring ‘food poisoning’ sa iba’t ibang mga lugar at malalaking restaurant.

*****

Ibig kong paalalahanan ang ating Pangulong Benigno Aquino III  kaugnay ng maayos at maganda niyang pamamalakad sa kanyang administrasyon na sinisira naman ng mga naka-ukyabit pa rin sa poder na mga dating mga pinagkakatiwalaan ng naka-detain na  dating Pangulo at ngayon ay Congresswoman Gloria Macapagal-Arroyo.

Tulad na lang nitong isang executive sa Land Transportation Office (LTO)  na walang alinlangang itinalaga sa maraming ‘juicy’ at maimpluwensyang pwesto itong isang babaing pinagtiwalaan noon ng trusted na pinuno ni PGMA sa LTO na si dating  LTO chief, Asec.  Aneli Lontok.

Ang nasabing babaing kawani na pinagtiwalaan noon ni Lontok, ang isa sa mga utak sa pagbebenta noon at ngayon ng mga ‘special plate’, ‘personal plate’ at ‘vanity plate’ na pinagkakitaan ng may P10 bilyun humigit-kumulang sa loob ng walong taong pamamayagpag ng PGMA administration.

At alam mo ba, Ginoong Pangulo, ni isang kusing ay wala pong pumasok sa kaban ng LTO sa P10 bilyung kinita sa mga ibinentang vanity, personal at special plate, dahil hindi ginamit sa mga ito ang mga ‘computerized receipt’ ng LTO kundi ang mga manual receipt na walang tatak ng LTO na umano’y ipinaimprenta sa Recto.

Isa pang karaketan ng nakaukyabit pa ring tauhan ng pinagtitiwalaan noon ni PGMA sa LTO ay ang pagpupuslit nito kasama ang isang Atty. Alex ng Bureau of Customs sa Subic Free Port ng mahigit sa 2,000 unit ng imported na sasakyan na kung saan inisyuhan nito ng mga  plaka kahit hindi rehistrado.

Ang nasabing babae na nakaukyabit pa rin sa pwesto sa kabila ng pagiging ‘trusted’ na tauhan ito ng PGMA administration ay utak din sa decentralization ng pag-iisyu ng Certificate of Stock Report (CSR) sa lahat ng regional offices ng LTO sa buong bansa na naging dahilan ng paglaganap ng car smuggling sa bansa.

At higit sa lahat, kumukulekta din ito ng limpak-limpak na halaga ng salapi hanggang sa kasalukuyan mula naman sa mga pinaboran niyang may-ari ng  maraming mga ‘emission testing center’, ‘drug testing centers’ at  medical practioners’ na nag-iisyu naman ng ‘medical certificate’ para sa mga  kumukuha ng  driver’s license.

Hinihinala tuloy ng maraming kawani ng LTO na nasuhulan umano si Asec. Torres ng malaking  bahagi ng kinitang P10 bilyuin mula sa mga vanity, special at personalized plate na ang salapi ay hindi nga pumasok sa LTO.

*****

At sino naman itong mataas na opisyal sa LTO na nakabili ng malaking mansion diyan  malapit sa dating Capitol Hills Golf Club na halos ang lahat ng kaanak niya sa Central Luzon ay doon pinatira upang magbantay ng kanyang limpak-limpak at milyung-milyung halaga ng salapi na ayaw nitong ideposito sa mga banko?

Pinayuhan pa umano si LTO official na bumili na lang o magpagawa ng lampas taong  ‘kaha de yero’ upang doon na lang itago o itabi ang limpak-limpak niyang salapi na dumarating sa kanyang mga palad simula nang maging isa siya sa mataas na pinuno ng LTO.

Ikaw din, Sir/Madam, baka matulad ka sa isang dating mataas na pinuno ng Department of Public Works and Highways(DPWH) noon na ayaw magsubi ng kinitang limpak-limpak na salapi mula sa mga ‘shady deals’ niya sa DPWH.

Sising-sisi  si Sir, dahil nang pasukin ang kanyang tahanan sa Marikina ng mga masasamang loob na  ‘heavily armed men’ ay wala siyang nagawa kundi pabuksan ang kanyang kaha-de-yero, upang  di barilin at patayin  ng mga ‘suspects’ ang mga mahal niya sa buhay na nasa kanyang bahay nang mga oras na iyon. Tskkk. tskkk.tskkk