IBANG klase ang pagiging hunyango ng bagman ng jueteng diyan sa Quezon City. Aba, nakapagpatayo pala ito ng sariling simbahan mula mismo sa perang nakukulimbat dahil sa pa-jueteng ni Don Ramon at iba pang sugal-lupa sa lungsod.

Ang tinutukoy nating bagman ay walang iba kundi si Gilbert dela Peste na dismissed police official ngunit hayagan kung gamitin ang pangalan ni Chief Supt. George Regis ng QC Police District.

Nagtataka naman ako kay Gen. Regis kung bakit wala itong ginagawang aksiyon para hulihin unang-una ang pasugalan ni Don Ramon at ipaaresto at paposasan si Gilbert dela Peste.

Dahil sa parang walang aksyong ginagawa si Regis para supilin ang pasugalan ni Don Ramon at kayabangan ni Gilbert dela Peste, parang gusto ko nang maniwala na ‘patong’ ang heneral sa sindikato ng dalawa.

Talaga bang masarap mamantikaan ng pera mula sa jueteng, Mr. Boy George? Mas masarap ba sa mantikang pinanggisa sa handa noong Media Noche?

Ilang percent kaya ito sa daily gross income ng pa-jueteng ni Don Ramon?

Attention PNP chief Director General Nick Bartolome.

Sir Nick, kailangan pa bang manawagan ng Journal Group sa inyo para mapakilos  nang husto si Gen. Regis?

Mukha kasing garapalan na ang ‘pambababoy’ sa order n’yo na bawal ang illegal gambling, samantalang ang pa-jueteng ni Don Ramon ay tatlong beses pa binobola araw-araw sa Quezon City.

Ang matindi rito, isang dismissed police official pa ang protektor at nagpapakilalang bagman ni Gen. Regis.

Ang klasik din dito, si Mr. Bagman, alyas Gilbert dela Peste, ay may sarili pang simbahan ngayon sa Don Antonio Heights.

Ibig sabihin, ginagamit nitong ‘front’ ang kinaanibang relihiyon sa kanyang illegal na gawain. Nagtatago kunwari sa mga salita ng Diyos pero iyon pala, puro kademonyuhan ang laman ng utak at katawan.

’Eto iyong mga tinatawag na buhay pa, pero sinusunog na ang kaluluwa sa impiyerno.

Siyanga pala, ang balitang padrino ni Gen. Regis ay ang  ginagalang at nirerespeto nating Iglesia Ni Cristo. Ano kaya ang magiging ‘comment’ nila kapag nalaman na parang may ibang ‘sinusuportahang’ relihiyon si Boy George?

Iyon ay kung totoong bagman nga niya si Gilbert dela Peste na hanggang ngayon ay patuloy na gumagamit sa pangalan ni Mr. General.

Kilos na kasi, Gen. Regis, nang hindi napagdududahang ‘patong’ ka talaga kay Don Ramon.

Para sa impormasyon ni Gen. Regis, ang hoodlum na si Boyet Bakulaw ang handler ni Don Ramon sa pa-lotteng nito, samantalang isa pang nagngangalang Jun Albaran naman ang tagapamahala ng jueteng ni Don Ramon na kung bolahin ay tatlong beses isang araw.

Nabunyag ang multi-million kinikita ni Don Ramon sa jueteng dahil kung dati’y may quota na sila ng P1.5 million hanggang P2 million total gross collection araw-araw, ngayo’y tumataginting na P2.5 million na ito bunsod na rin sa karamihan sa mananaya ngayon ay  may pera dahil na rin sa araw ng Kapaskuhan.

Ang area ng pa-jueteng at pa-lotteng ni Don Ramon ay mula District 1 hanggang District 6. 

Lintek na ’yan, talagang organisado na ang sindikato ng hinayupak na si Don Pepot, este Don Ramon!

Sa susunod, iisa-isahin pa natin ang pa-jueteng naman ni Don Ramon sa  Occidental Mindoro.

Tingnan natin tigas n’yo, mga kamote!