BALIUAG, Bulacan  -- Dinakip sa aktong nagbebenta ng iligal na droga ang mag-live-in partner sa isang buy bust operation sa Bgy. Makinabang, dito, Martes ng gabi.

Sa ulat kay Senior Supt. Fernando Mendez Jr., Bulacan police director, kinilala ni Supt. Rizalino Andaya, Baliuag police chief, ang mga nahuling suspek na sina Edna Sampoang, 43, walang trabaho, at Randy Mauricio, 28, may-asawa, mga residente ng Bgy. Makinabang, Baliuag.

Ayon sa ulat, dakong alas-7 ng gabi nang maaresto ang mga suspek matapos makatanggap ng tip ang pulisya tungkol sa garapalang bentahan ng droga sa lugar.

Agad nagtungo ang mga pulis at naaktuhan ang mag-live-in partner habang nagbebenta ng shabu kaya hindi na nakapalag ang mga ito ng arestuhin.

Nakumpiska sa pangangalaga ni Sampoang ang 15 plastic sachet na naglalaman ng methamphetamine hydrochloride o shabu na nagkakahalaga ng P10,000.

Nakuha naman kay Sampoang ang isang plastic sachet na may laman ding shabu, isang balisong at mga drug paraphernalia.

Naglagay din ang mag-live- in partner ng surveillance device sa labas ng kanilang bahay para ma-monitor ang pumapasok at dumadaan sa harap nito at para matunugan din  kung may mga pulis na umiikot sa kanila.

“Kumpleto ng camera ang harap ng bahay nila kaya alam nila kung sinu-sino ang mga dumadaan sa harapan ng bahay nila,” ani Andaya.

Kinumpiska rin ng otoridad ang mga surveillance device tulad ng 19” LCD TV, closed circuit camera, remote control jack connector, camera selector, edifier colume selector at mga cable wire.

Kasalukuyang nasa kustodiya ng Baliuag police ang mag-live-in partner habang inihahanda ang mga kasong kahaharapin nila.