CAMP PACIANO RIZAL -- Binawian ng buhay habang nilalapatan ng lunas sa pagamutan ang 19 anyos na Sangguniang Kabataan chairman (SK) makaraang aksidente umanong mabundol ang minamaneho nitong motorsiklo samantalang sugatan ang backrider nito sa kahabaan ng National Hi-Way, Bgy. Bulilan Sur, bayan ng Pila, lalawigang ito kamakalawa ng madaling araw.

Batay sa report ni P/Insp. Owen Banaag, hepe ng pulisya, kay Laguna PNP provincial director P/Supt. Gilbert Cruz, nakilala ang biktimang si SK Chiarman Regino Dorado, binata, at ang sugatang backrider nito na si Anthony Conocono, 28, may asawa, pawang mga residente ng nasabing barangay.

Ang biktimang si Dorado ayon sa report ay nagtamo ng maraming sugat sa kanyang ulo at katawan dahilan para agaran itong mawalan ng buhay habang si Conocono naman ay nagtamo ng sugat at pasa sa kanang binti at ibang bahagi ng kanyang mukha at dalawang kamay.

Nabatid sa resulta ng imbestigasyon, dakong 1:10 ng madaling araw habang papauwi na ng kanilang tirahan ang mga biktima lulan sa naturang motorsiklo mula sa poblacion nang hindi umano inaasahang mawala ito sa tamang direksiyon dahilan para ito bumaligtad at aksidenteng tumama sa concrete barrier ng construction site ang ulo ni Dorado.  Tumilapon naman si Conocono kung saan nasa mabuti na itong kalalagayan.