SA gitna ng kontrobersiya sa pagkamatay ng hostage-taker na si Noel Orate Sr., kinatigan ng kanilang mga kasamahan sa konseho ang mag-asawang sina Bulacan Provincial Board Member Allan Robes at Quezon City Councilor Jessica Daza.

Sa Bulacan, nagpalabas ng resolusyon si Kasangguni Enrique ‘Buko’ V. Dela Cruz Jr. upang ipahayag ang buong pagsuporta ng provincial board kay Robes.

Ayon sa  provincial board, buo pa rin ang kanilang tiwala kay Robes. “Ang Sangguniang Panlalawigan ay naniniwala kay Board Member Allan Robes at sa kanyang ipinakitang katapatan sa serbisyo, integridad at mahusay na panunungkulan sa mahabang panahon sa ika-apat na distrito at sa buong lalawigan ng Bulakan.

Ipinanganak noong  Oct. 8, 1973, nagtapos si Robes ng Bachelor of Arts, Philosophy sa University of the Philippines at Bachelor of Business Administration, Computer Information Systems sa Baruch College, New York, USA. Kakatapos lang ni Robes ng kanyang  Masters in Public Administration sa Ateneo de Manila University.

Bilang professional na business executive,  madaling nagagawa ni Robes ang kanyang trabaho bilang board member ng Bulacan  dahil nananalaytay sa kanya ang dugo ng kanyang lolo na si  dating mayor ng San Jose del Monte na si Emong Robes, at tiyo na si Congressman Arthur Robes.

Kailan lang ay napili si Robes bilang Minority Floor Leader ng  Sangguniang Panlalawigan at pinamumunuan niya ang  Committee on Public Works.

Nauna nang sinabi ni Robes na kanyang nabaril at napaslang si Robes upang ipagtanggol ang kanyang sarili at mga kaanak. Bago ito, napag-alaman na hinostage ni Orate si Robes at ang pamilya Daza kabilang ang kanyang buntis na asawa noong Feb. 10.

Kaugnay nito, isinulong ng Sangguniang Panlalawigan ang karapatan ni Robes na ipagtanggol ang kanyang sarili laban sa mga akusasyon dulot ng naturang insidente.

“Sa ilalim ng batas ay may karapatan si Board Member Allan Robes na magpaliwanag sa totoong mga pangyayari at s’ya ay marapat na ituring na inosente hanggang hindi natatapos ang buong proseso ng batas,” pahayag ni Dela Cruz.

Samantala, nagpahayag naman ng pagsuporta ang buong konseho ng Quezon City sa asawa ni Robes na si Daza.

Sa isang resolusyon,  pinatotohanan ng buong konseho ang integridad, katapatan at katauhan ni Daza bilang isang lokal na mambabatas at propesyunal na  manggagamot na may mabuting reputasyon at likas na kabutihan.

“The Quezon City councilors vouch for the integrity, honesty and character of Councilor Daza as  a public servant. She is a woman of good repute and good nature,” sabi ng resolusyon.

Pinahalagahan ng konseho ang desisyon ni Daza na magsilbi sa taumbayan sa kabila ng mabigat na obligasyon bilang pribadong doctor.

“She brought to bear her medical skills and talent and made use of her public office as the vehicle to advance her vision of accessible free health care for the poor,” dagdag pa ng mga kasamahan sa konseho.