PATAY ang isang mister matapos na barilin ng kalaguyo ng kanyang misis na umano’y kinumpronta nito ilang oras matapos niyang maaktuhan ang dalawang nagtatalik sa bahay ng suspect kamakalawa ng gabi sa Negros Occidental.

Kinilala ang biktima na si Alejandre Alemani, 54, residente ng Barangay Buenavista, Murcia, Negros Occidental.

Arestado naman ang suspect na nakilalang si Roger dela Paz, residente rin ng naturang lugar.

Batay sa ulat na nakarating sa Camp Crame, ang insidente ay naganap sa labas ng tahanan ng suspect.

Una umanong naghinala ang biktima na may ibang lalaki ang misis nang umalis ito sa kanilang bahay sa mismong ‘Araw ng mga Puso.’

Lingid sa kaalaman ng ginang ay nasundan ito ng biktima na nagtungo sa bahay ng kanyang kalaguyo kung saan sila naaktuhang nagtatalik.

Bagama’t alipin ng selos ay minabuti ng mister na umuwi sa kanilang bahay at doon hinintay ang ginang.

Nang makauwi ang ginang ay agad niya itong kinumpronta at binugbog.

Hindi pa nakuntento ang biktima at sinugod ang kalaguyo ng misis subalit hindi pa ito nakakalapit sa pintuan ng bahay ng suspect ay pinaputukan na ito.

Dead on the spot ang biktima habang inaresto naman ang suspect.

Sa himpilan ng pulisya, inamin nito  na may relasyon nga sila ng misis ng biktima subalit itinanggi nitong siya ang bumaril sa huli.

Sa kasalukuyan, patuloy ang isinasagawang imbestigasyon ng pulisya upang bigyang linaw ang insidente.