NAIC, CAVITE -- Isang matagumpay na pre-launching festivity para sa “Pawikan Conservation and Protection Project” ang isinagawa sa bayan ng Naic, Cavite, kamakailan sa pangunguna ni Mayor Edwina P. Mendoza. Ito ay dinaluhan ng maraming tao mula sa iba’t ibang ahensya ng pamahalaan, paaralan at pribadong sektor.

Dumating din bilang mga panauhing tagapag-salita si Cavite Governor Jonvic C. Remulla at ilang tauhan ng DENR-PAWB upang bigyang inspirasyon ang mga taga- Naic sa mahalagang okasyon, ang pangalagaan ang mga pawikan at tumulong na pigilin ang unti-unting pagkaubos nito.

Ang ginawang selebrasyon ay bilang simula ng paghahanda sa isang malakihang paglulunsad ng nasabing proyekto sa bayan ng Naic para sa susunod na taon.

Bilang nag-iisang bayan sa Cavite na nagsasagawa ng proyektong nauukol sa pangangalaga  ng pawikan (sea turtle), inaasahan na ito ay susuportahan ng iba’t ibang ahensya ng pamahalaan na nangangalaga sa kalikasan, mga paaralan bilang bahagi ng pag-aaral at ng iba’t ibang sektor na ang layunin ay makaganap sa tungkuling mapamahalaan ang kalikasan.

Nagsimula ang pangangalaga sa mga pawikan sa bayan ng Naic maraming taon na ang nakakaraan subalit nagsimula lamang itong mabigyan-pansin ng pamahalaan at pribadong sektor nang ang MENRO office sa LGU ng Naic ay maging aktibo.  Noong Setyembre 2011, pagkatapos ng magkakasunod na oryentasyon at seminar tungkol sa pangangalaga sa mga pawikan, napagpasiyahan ng pamahalaang bayan ng Naic na magdaos ng isang pagdiriwang tungkol sa pawikan katulad ng ginagawa sa Morong, Bataan.   Roy Tomandao