DAGUPAN CITY -- Umaabot sa 12 sako ng talaba at lukan na positibo sa red tide ang nakumpiska ng city agriculture office ng Dagupan.

Ayon kay City Agriculturist Emma Molina, tinangka umanong ibagsak ang mga ito sa iba’t ibang lugar tulad ng Lucao, Tambac, Dawel, at Magsaysay market.

Ang ipinagtaka ni Molina ay kung bakit may dalang auxiliary invoice mula sa local government sa ilang coastal town ng Western Pangasinan sa kabila ng pagdedeklarang positibo sa red tide ang mga shellfish sa kanilang bayan.

Giit ni Molina, patuloy na ipinagbabawal pa rin ang mga shellfish na galing sa Anda, Bolinao at Bani.

Nanatili namang negatibo sa red tide ang shellfish sa mga lungsod ng Dagupan at Alaminos. 

Michael Ratti