MARILAO, Bulacan -- Nahaharap ngayon sa kasong illegal possession of firearms and ammunition ang isang construction worker matapos na mahulihan ng isang improvised pistol at bala ng caliber 5.56 mm sa  Bgy. Lias noong Miyerkules.

Kinilala ni Marilao police chief Supt. Gerardo Andaya sa kanyang report kay Bulacan police director Senior Supt. Fernando Mendez Jr., ang suspek na si Jose delos Reyes, 40, residente ng Phase 8A, Package 12, Blk. 171, Lot 24, Bagong Silang, Caloocan City.

Ayon sa report, nakita ng mga barangay tanod ang suspek na kinukuha ang bisikleta ni Romel Aquino, 32, residente ng Gaspar St., Thomas, Bgy. Lias.

Agad na inimbita ang suspek sa barangay hall para imbestigahan at nakuhanan ng baril ang suspek.

Dinala agad ang suspek sa himpilan ng pulisya sa Marilao.

Samantala, dalawa katao ang inaresto ng Marilao police dahil sa pamemeke ng mga dokumentong  isinumite para makakuha ng police clearance.

Kinilala ni Andaya ang mga suspek na sina Avelino Gidones, 31, binata at Jumilo Monares, 21, kapwa residente ng Bgy. Saog, Marilao, Bulacan.

Sa inisyal na imbestigasyon, kukuha  ang suspek ng police clearance nang mapansin ng mga operatiba na peke ang isinusumite nitong mga dokumento tuland ng NBI clearance, NSO clearance at high school diploma.

Napag-alaman din na kinuha ng suspek ang mga pekeng dokumento sa  Claro M. Recto, Sta Cruz, Manila, sa halagang P600.

Nahaharap ang mga suspek sa kasong Violation of Art 176, RPC o Possession of Falsified Public Documents.