CAMP Paciano Rizal -- Dead on the spot sa riding in tandem ang isang 46 anyos na lalaking negosyante at ang bodyguard nito makaraang tambangan sila at malapitang pagbabarilin habang nagbibisikleta sa Manila East Road Bgy. Bulihan, Famy, kahapon ng umaga.

Sa report ni Senior Insp. Gerry Sanggalang, hepe ng pulisya, kay Laguna PNP provincial director Senior Supt. Gilbert Cruz, mga tama ng bala sa likuran at iba’t ibang bahagi ng katawan mula sa kalibre .45 na baril ang tumapos sa buhay  nina Juan Gatdula Jr., 46, may asawa, negosyante at kapatid ng head ng Public Attorney’s Office (PAO) ng nasabing lugar, nakatira sa Real Velasquez St., Bgy. 3; at ng kanyang bodyguard na si Timoteo Maala, 54, nakatira sa Bgy. Tungkod.

Sa imbestigasyon ni P01 Cris Egargue, may hawak ng kaso, nakasakay ng bisikleta si Gatdula habang si Maala ay sakay ng kanyang motor at nakabuntot kay Gatdula  patungo sa poblasyon ng nasabing bayan  nang harangin sila ng dalawang armadong suspek na nakasuot ng helmet.

Base sa  impormasyong nakalap, si Gatdula ay miyembro ng Municipal Development Council ng bayan ng Sta. Maria na tumatayong representante ng mga negosyante sa nasabing bayan at kilalang matalik na kaibigan, kaklase at supporter ni Mayor Atty. Antonio Carolino ng Sta. Maria.