MARIING binatikos ng Bantay Gloria Network (BGN) kahapon ang temporary restraining order (TRO) sa dollar bank accounts ni impeached Chief Justice Renato Corona na “pagyurak sa hustisya.”

Kaugnay nito ay muling iginiit ng BGN, pati na ng kaalyado nitong Black & White Movement, ang pagbibitiw ni Corona o pwersang pagpapabakasyon sa kanya sa SC habang nililitis sa Senado.

“Kung papaanong nag-isyu ang Corona-led SC ng TRO para matakasan ni Gloria Arroyo ang plunder at electoral sabotage case niya ay nagsasabwatan na naman ang mga Arroyo justices para naman iligtas si Corona,” wika ni BGN spokesperson Risa Hontiveros.

“Ang TRO sa dollar deposit ni Corona ay lantarang pagharang sa  pagkilos ng Senado na mapalabas ang katotohanan kaugnay ng multi-milyong deposito niya sa mga bangko. Bakit naman itinatago ni Corona ang limang dollar accounts niya na ang isa ay sinasabing naglalaman ng $700,000 o mahigit P30 milyon?”

“Iyan ba ay dahil imposibleng magkamal siya ng ganoong kalaking pera sa kakarampot na sweldo ng isang mahistrado ng Korte Suprema?” tanong pa ng dating representante ng Akbayan.

Sinabi naman ni Leah Navarro ng Black & White na malinaw na nagkakampi-kampi ang mga appointee ni dating Pangulong Arroyo sa SC para madiskaril ang paglabas ng mga ebidensya laban kay Corona.

Nanawagan si Navarro sa mga senator-judges na “balewalain ang TRO at ipagpatuloy ang paghahanap ng katotohanan sa mga pag-aari at salapi na hindi idineklara ni Corona sa kanyang Statement of Assets, Liabilities and Networth (SALN).

Idinagdag pa ni Hontiveros na sa pagkakabuking ng P19.7-milyong deposito ni Corona sa PSBank at P12 milyong deposito sa Bank of the Philippine Islands noong 2010, sapat na ang ebidensya na hindi siya naging matapat sa pagsusumite ng kanyang SALN.

Ipinaalala ni Hontiveros sa Senado na isang taon pa lang ang nakararaan nang magdesisyon ang SC na apirmahin ang conviction at pagpapakulong sa isang maintenance man sa Naga dahil lang hindi niya nailagay sa kanyang SALN na may malapit na kaanak siya sa gobyerno.

“It has been conclusively shown in the ongoing impeachment trial that Corona has not been telling the truth in his SALNs. It has been shown that he has failed to declare millions of pesos in his PSBank and BPI bank accounts,” wika ni Hontiveros.

“It has already been previously established that he declared his Bellagio penthouse unit in his SALN as worth only P6.8 million when he himself admitted that he bought it for P14.5 million. The same with his Burgundy condo unit, which he declared as worth only P870,000 when in fact he acquired it for P3.5 million.

“Dishonesty is inexcusable for a Chief Justice who should be a paragon of virtue and of unblemished integrity. Corona fails the test of probity with his misdeclarations and undervaluation of his properties and bank accounts in his SALNs,” pagtatapos ni Hontiveros.

SC TRO ipinababasura ng Akbayan sa Senado

Samantala, iginiit ng Akbayan Party sa Senado  ang pagmamatigas at pagbasura sa anito’y “napaka-bias” na temporary restraining order (TRO) na inisyu ng Korte Suprema laban sa pagbubukas ng dollar accounts ni impeached Chief Justice Renato Corona.

Ayon kay Akbayan Rep. Walden Bello, ang karamihan ng mga abogado at constitutionalists na nakausap nila ay naniniwala na nagkaroon ng grave abuse of discretion ang Korte Suprema nang panghimasukan ang esklusibong kapangyarihan ng Senado na litisin ang reklamo laban sa mga impeachable official sa bansa tulad ni Corona.

“The Senate must stand its ground because under the Constitution, it is superior to the SC in any and all matters pertaining to the impeachment of Corona,” wika ni Bello.

“If the Senate gives in to the SC in this first instance, nothing will stop Corona’s pals at the SC from undermining further the authority of the Senate as an impeachment tribunal,” dagdag ni Bello.

Kung hindi ibabasura ng Senado ang TRO, ituturing ito ng SC na isang kahinaan na sasamantalahin ng “old boys’ club sa SC” para iligtas si Corona sa pagdedeklara ng SC na isang “nullity” ang trial ni Corona.

Binigyang-diin pa ni Bello na ang na-TRO na dollar accounts ni Corona sa PSBank ay walang pinagkaiba sa “second envelope” na ang hindi pagkakabukas ng Senado sa impeachment trial ni Pangulong Joseph Estrada ay nagresulta sa EDSA Dos people power revolution.

“The biased TRO is pushing our country to the brink of a constitutional crisis. And those who try to cover up a crooked justice’s sins against the Filipinos are themselves crooks,” wika ni Bello.