IDINAWIT ng isang nagngangalang Olga Belisario  ang napatay na hostage-taker na si Noel Orate Sr. sa isang kaso ng murder noong 1993 sa Zamboanga City.

Sa isang blog na kanyang ipinoste sa website ng ABS-CBN noong Feb. 12, 2012,  dalawang araw matapos ang madugong hostage-taking  sa Quezon City noong Feb. 10, sinabi ni Belisario na pinatay ni Orate ang kanyang ama noong March 24, 1993.

“Noel Orate Sr. killed my father last March 24, 1993,” pahayag ni Belisario. Bukod kay Orate, idinamay din ni Belisario ang anak nito na si Noel Orate Jr. sa naturang krimen. “Noel Orate Jr. was the one who handed the gun to  his father and shot my father five  times ending his life,” dagdag pa ni Belisario.

Ayon kay Belisario, ang pagpaslang ni Orate sa kanyang ama ay nasaksihan nilang apat na magkakapatid gayun din ng pamilya ni Orate. “All my siblings (all four of us) were there to see it  and Noel Orate’s three children Noelyn, Rambo  (Noel Jr.) and baby and the wife were there to witness this as well...,” ani Belisario.

Sinabi ni Belisario na dating nag-aaral ang mga anak ni Orate sa isang pribadong paaralan sa Zamboanga City ngunit nilisan ng pamilya Orate ang naturang syudad upang takasan umano ang nasabing krimen.

Napag-alaman sa blog ni Belisario na nagpalabas ng warrant of arrest ang isang korte sa Zamboanga laban kay Orate ngunit hindi ito naipatupad dahil tumungo ito sa Maynila at nakahanap ng trabaho sa pharmaceutical company na Unilab.

“A warrant of arrest (was) issued by a court in Zamboanga but apparently it was not served... My mother wrote United laboratories about such incident and begged the company to turn him over or at least inform the authorities of his whereabouts but this fell on deaf ears... We were surprised when we found out that he was even promoted by Unilab,” ani Belisario.

“We were all adolescents then when this happened. My mom was studying in UP for her doctorate degree. The one who was with us at the time my father was killed was my grandmother (my father’s mother). He  shot my father during his birthday,” dagdag pa ni Belisario.

Nagpahayag naman ng pagkapalagay si Belisario sa mga naganap nitong mga nakaraang araw at sinabi sa kanyang blog na “the Lord works in mysterious ways.”

Kailan lang ay nabaril at napatay ni Bulacan Provincial Board Member Allan Robes si Orate sa Quezon City dahil sa pangho-hostage sa dati nitong kasintahan na si former Congresswoman Nanette  Daza at sa pamilya nito kabilang ang buntis na asawa ni Robes na si Quezon City Councilor Jessica Daza.

Pinabulaan naman ng mga abogado ng pamilya Daza na may CCTV sa tahanan ng dating kongresista kaya’t walang basehan ang bintang ng kampo nila Orate na may tinatago silang video footage.

“Mas maganda nga sana kung may CCT sa bahay nina Nanette  para makita sana ang ginawang pangho-hostage sa kanila,” ani Atty. Freddie Villamor.

Samantala, patuloy naman umanong sinasaliksik ng mga awtoridad ang sinasabing kaso ni Orate base na rin sa mga pahayag ni Belisario. Napag-alaman na makakatulong ang National Bureau of Investigation (NBI) sa pagberika ng mga kanyang ipinahayag dahil may dokumento umano ang NBI ukol sa naturang murder case.