“NAPAPANAHON na para sa mga maralitang tsuper na maglunsad ng panibagong tigil-pasada o transport strike.”

Ito ang pahayag ng grupong Kalipunan ng Damayang Mahihirap o Kadamay, hinggil sa hindi tumitigil na pagtaas ng presyo ng produktong petrolyo sa lokal na merkado. 

Dagdag pa ng grupo, dapat magkaisa na ang iba’t ibang transport groups sapagkat sila ang pangunahing tinatamaan ng bawat sentimong pagtaas sa presyo ng langis.

Hinihikayat ng Kadamay na ulitin ng mga tsuper ang ginawa nilang tigil-pasada noong Setyembre 19, 2011 kung saan halos naparalisa ang trapiko sa buong bansa. Hinihimok din ng grupo na makiisa na ang lahat ng transport group sa bansa lalo na ang mga hindi lumahok sa nakaraang tigil-pasada dahil sa mga binitawang pangako ni Pangulong Aquino.

Ayon kay Francis Esponilla, isa sa tagapagsalita ng Kadamay, sapat na umano ang panahon na aabot sa limang buwan matapos ang naganap na diyalogo ng Pangulo sa mga transport group leaders noong Setyembre 14, 2011, para sa administrasyong Aquino na isagawa ang mga ipinangako nito sa taumbayan.

Ayon sa tala ng Kadamay, halos 13 beses nagtaas ang diesel at gasoline sa lokal na pamilihan, matapos ang naganap na diyalogo sa Malacañang noong Setyembre. At simula naman ng maging presidente si Aquino, P13.69 na ang itinaas ng presyo ng diesel kada litro sa lokal na pamilihan, samantalang P13.93 naman ang itinaas ng presyo ng gasolina kada litro.     Jun Icban Legaspi