PINANGANGAMBAHANG patay na ang isang 14 anyos na dalagita matapos na tumalon sa ilog na sakop ng isang barangay sa lungsod Quezon kamakalawa ng gabi dahil umano sa problema sa pamilya.

Ayon kay Jorge Sea, desk officer ng Barangay Doña Imelda, nakilala ang biktima na si Analyn Tongian, pansamantalang nanunuluyan sa 42 Kapiligan, Bgy. Doña Imelda, QC. 

Sinasabing galing Visaya ang biktima at dinala lamang umano ng kanyang tiyahin sa Manila para magbakasyon.

Sinabi ni Sea, nangyari ang insidente 10 p.m. habang nakatayo ang biktima sa tabi ng ilog na tila nakaambang tumalon. Dahil dito, ilan sa mga residente sa lugar ang nangamba kung kaya ipinasyang ilayo ito sa lugar.

Pero habang dinadala patungo sa kanyang bahay ay nagpumiglas ang biktima saka muling nagtungo sa ilog at tumalon.

Patuloy ang paghahanap ng mga awtoridad partikular ang Coast Guard sa nasabing biktima.

Ayon sa kasintahan ng biktima, napansin niya na malungkot  ito sa nakalipas na mga araw at nagpahiwatig pa diumano na gusto na niyang wakasan ang kanyang buhay dahil sa problema sa pamilya.                                  Melnie Ragasa-Jimena