“NAKABUNDOL ako ng lalaki. Dalhin mo lahat ng alahas ko at magkita tayo sa SM Manila. Huwag na huwag mong kausapin ang driver kapag nag-taxi ka.”

Ito umano ang sinabi kay Margaret Gan, 23, ng isang babaing nagpanggap na kanyang ina at tumawag sa kanya noong Biyernes.

Sa isang reklamo na iniharap niya sa Manila Police District-General Assignment Section na pinangungunahan ni Mar Reyes, sinabi ni Gan na tumawag sa kanya ang isang babaing kaboses na kaboses ng kanyang ina.

Sinabi ng tumawag kay Gan na  may nabundol ito habang nagmamaneho at kailangan niyang bayaran ang pagpapagamot nito sa ospital. Ang nabundol umano ay nag-aagaw-buhay.

Inutusan ng nagpapanggap na ina si Gan na kunin ang lahat ng alahas at magtaxi papuntang SM Manila kung saan sila magkikita.

Sinabi pa ng “pekeng ina” na huwag sabihin sa driver ng taxi ang pangyayari.

Nang nasa mall na si Gan ay sinalubong siya ng isang babaing nasa 30 ang edad at 5" ang tangkad. Sinabi nitong inutusan siya ng ina ni Gan na kunin ang mga alahas.

Pagkabigay ni Gan ng alahas ay sinabihan siyang hintayin ang kanyang ina. Matapos ang ilang oras ay ’di dumating ang kanyang ina.

Dito naisip ni Gan na siya ay naloko kung kaya’t tumungo siya sa MPD para magsampa ng reklamo.