BINALOT ng tensiyon ang mga residente sa isang mataong barangay makaraang magwala at pasingawin ng isang lalaki ang hawak na liquefied petroleum gas (LPG) tank saka tumalon sa ikaapat na palapag na naging dahilan ng kanyang kamatayan sa lungsod ng Pasay kahapon.

Ang biktima ay nakilalang si Andres Bayrante, nasa hustong gulang, naninirahan sa 157 Daisy St., Pasay City. Siya ay nalagutan ng hininga sa Pasay General Hospital dahil sa tinamong pinsala sa iba’t ibang parte ng katawan.

Batay sa imbestigasyon ng pulisya, ang insidente ay naganap alas-2:30 ng madaling araw sa gusali na pag-aari ni Joezer Bolalin, ng Daisy St., Bgy. Maricaban.

Ayon sa ulat, nagsumbong ang ilang concerned citizens kay Bolalin na si Bayrante ay nakita nilang may dalang LPG tank na may kakaibang amoy.

Mabilis na rumesponde sa lugar ang Pasay City police at  mga tauhan ng Bureau of Fire Protection kung saan ay pinalibutan nila ang gusali na kinaroroonan ni Bayrante na nasa ika-apat na palapag.

Nabatid na pinakiusapan ng mga otoridad ang suspek na bitawan ang hawak na tangke at sumuko nang mapayapa ngunit nagbanta pa ang huli na susunugin nito ang buong gusali.

Nang masusukol na ng pulis si Bayrante ay ibinalibag nito sa mga pulis ang tangke at mabilis na tumalon at lumagpak ito sa bubungan ng bahay na pag-aari naman ng isang Margarita Avengoza.

Ang suspek ay isinugod ng mga tauhan ng Pasay City Rescue Team sa Pasay City General Hospital kung saan ito nalagutan ng hininga alas-4:20 ng madaling araw.