ISA na namang bangkay ng lalaking hinihinalang biktima ng “salvage” ang natagpuan sa Angono, Rizal, kahapon ng madaling-araw.

Ayon kay SPO1 Edgar Petalvero, may hawak ng kaso, ang biktima na itinataling parang baboy ay ibinalot pa sa kumot matapos na tadtarin ng saksak sa iba’t ibang parte ng katawan.

Ito ay natagpuan dakong alas-5:45 ng umaga sa kahabaan ng Botong Francisco Road,  Bgy. San Isidro, Angono, Rizal.

Ayon kay SPO1 Petalvero, walang nakuhang mapagkilanlan sa biktima at isinalarawan na nasa edad 20 hanggang 25, may taas na 5’2 hanggang 5’4, nakasuot ng green na T-shirt at katamtaman ang pangangatawan.

Posible na malaki ang galit ng mga suspek sa biktima dahil sa dinanas na matinding pahirap base sa mga marka sa kanyang katawan at sa leeg na may marka rin ng pananakal, ayon pa sa imbistigador.

Nabatid pa sa imbestigador na ang bangkay ay ilang oras pa lamang namamatay dahil sa malambot pa ang katawan nito at  halatang  pinatay sa ibang lugar at itinapon lamang sa bayan ng Angono para iligaw ang imbestigasyon.

Nalaman na kamakailan lamang ay dalawang bangkay ng lalake na kapwa naka-posas ang mga kamay at may mga tama ng bala sa ulo at mga katawan ang natagpuan naman sa bayan ng Pililla, Rizal.

Ito ang ikatlong biktima ng salvage sa buwan lamang ng Enero 2012 mula nang maupo ang bagong Provincal Police director na si Senior Supt. Rolando Anduyan.