Madalas tayong magreklamo sa klase ng pamamahala sa atin. Maging sa organisasyon man ito, sa negosyo o sa gobyerno. Palaging ang management o administrasyon ang may kasalanan kapag may mga bagay na hindi naisasaayos. Ngunit, ayon sa Salita ng Diyos, lahat tayo ay may pananagutan na ayusin ang dapat ayusin. Lalo na kung nasa ating mga kamay ang kapangyarihan na bigyan ito ng solusyon.

Noong nagpasya ang Tatlong Persona ng Diyos na gumawa ng tao, nilayon na ang pangunahing pagkakahawig ng tao sa Diyos, ay ang  kakayahan ng tao na mamahala sa buong sangkalikhaan. Ang tao ay pinaka-katulad ng Diyos sa kapangyarihan nito na bigyang anyo ang kalikasan. Isinasalarawan ng tao ang isang mahalagang katangian ng Diyos sa pagiging malikhain nito sa pangangasiwa ng sangkalikhaan.

Ang utos na mamahala ay para sa lahat ng tao. Iniatang ito sa babae at sa lalaki. Ito ang ikalawang bahagi ng tinatawag na ‘Cultural Mandate’ – ang pagyamanin at pangalagaan ang sangkalikhaan.

Bukod sa utos na lumago, ang tao ay inatasan din na pagyamanin ang lupang pinaglagyan sa atin. Ang unang tao ay may gawain, kahit na nuong siya ay nasa paraiso pa lamang. Inakala natin na ang pagtatrabaho ay pahirap na bunga ng pagkahulog ng tao sa kasalanan. Hindi ganun. Ang pagtatrabaho ay sadyang bahagi ng pagkakagawa sa atin. Layunin talaga ito ng Diyos para sa atin. Ito rin ang dahilan kung bakit kapag wala tayong trabaho, nakakaramdam tayo ng panliliit ng sarili, at ng matinding kawalan ng saysay at direksyon sa buhay. Sapagkat hindi tayo nilalang upang magpakatamad.

Sa Genesis 1:26, ginamit ang salitang Hebreo na ‘radah’ para sa pakahulugan na ‘mamahala’ o ‘pamahalaan.’ Samantala, sa Genesis 1:28, ginamit naman ang ‘kabas’ na ang pakahulugan ay ‘yurakan’  o ‘tapak-tapakan.’ Ang ibig sabihin nito, ang pamamahala ay nangangailangan ng lakas at pagbabanat ng buto. Nuon pa man, ang pagsasaayos ng mayabong na kalikasan ay nangangailangan ng lakas at pagpapawis.

Hindi madaling gawain ang mamahala. Ngunit binigyan tayo ng Diyos ng kapangyarihan upang isagawa ito. Lahat tayo ay may kakayahang maging katiwala o lider ng isang sambahayan o organisasyon.

Sa ganang amin, malinaw na ang pamamahala na iniatang sa atin ng Diyos ay hindi lamang pamamahala sa ating kalikasan at mga tahanan. Gayundin, sa pag-usbong ng mga komunidad at kultura, inaasahan din na mapapamahalaan natin nang masinop ang ating lipunan. Kaya hinihikayat namin kayo na makiisa sa pagmamasid sa mga nangyayari sa ating lipunan. At kung kinakailangan nating kumilos upang masiguro ang kaayusan ng ating lipunan, huwag tayong mag-atubili na tumalima sa utos ng Diyos sa atin na pamahalaan nang maayos ang ating nasasakupan.

-------------------------------------------------

Ang Sa Ganang Amin ay kalipunan ng mga editoryal ng ISACC. Ginagawa ito sa pakikipagtulungan ng People’s Tonight, DZAS at AP Media. Para sa inyong komentaryo, maaaring mag-email sa This e-mail address is being protected from spambots. You need JavaScript enabled to view it. .