Kung tayo ay mahirap o mababa ang lagay sa lipunan, kung minsan ay nanliliit tayo na mapasama sa mga mas nakaka-angat sa atin. Nag-aalangan tayo na makipag-usap o makisalamuha sa kanila.

Ngunit ayon sa Salita ng Diyos, hindi tayo dapat manliit. Pagkat ang lahat ng tao ay ginawa na kawangis ng Diyos.

Ano ang ibig sabihin nito?

Balikan natin kung paano ginawa ng Diyos ang tao. Di tulad ng mga naunang nilikha ng Diyos, ang pagkalalang sa tao ay pinag-usap-usapan muna ng Tatlong Persona ng Diyos. Hindi lamang basta binigkas o sinalita ng Diyos ang pagkakalikha sa tao, gaya ng ginawa Niya sa buong sangkalikhaan. Sa halip, pinagpulungan ng Tatlong Persona ng Diyos ang pagkalikha sa tao. At hindi lang ‘yon. Nilayon din ng Diyos na tao ang mamamahala sa mga isda, ibon at lahat ng hayop na nasa lupa.

Sa lahat ng nilalang, ang tao lamang ang hinirang na maging kahalintulad ng Diyos. Totoo na may bahagi sa ating pagkatao na tulad ng kalikasan – hinubog ang tao mula sa alabok. Gaya rin ng lahat ng hayop sa lupa, kailangan tayong kumain, matulog, mag-asawa at magsabog ng binhi upang magkaroon ng susunod na henerasyon. Gayundin, ang tao ay mamamatay at babalik sa alabok na pinanggalingan nito. Ngunit may natatanging elemento ang pagkakagawa sa tao: binahaginan tayo ng Diyos ng buhay na mula sa kanyang hininga.

Sa orihinal na Greek, sinasabi na ang ‘paghinga’ ng Diyos sa hinubog na lupa ay maihahalintulad sa pagyakap ng isang nagmamahal na nagbabahagi ng kanyang pagkatao. Dahil sa hiningang ito, nabigyan ng buhay na kakaiba ang tao. Hindi ito ang hininga na nalalagot kapag namamatay ang isang hayop. Ito ay ang ‘breath of life’ o hininga ng buhay na hindi lamang nagpapagalaw kundi nagpapasigla rin sa atin kapag tayo ay gumagawa ng mga bagay na umaayon sa ating pagkakahawig sa Diyos. Tulad ng kakayahang mag-isip, magmahal, magsakripisyo para sa iba, managutan sa kapwa at mangarap para sa kinabukasan.

Sa ganang amin, ito rin ang dahilan kung bakit may tinatawag na ‘human rights’ o kaparapatang pantao. Dahil tayo ay ginawa sa imahe ng Diyos, ang pagyurak sa dangal o pagkitil  ng buhay ng isang tao ay malaking kasalanan sa Manlilikha na lumalang sa atin nang buong pagmamahal at pagtatangi.

Ayon sa datos na nakalap ng grupong Karapatan mula January 21, 2001 hanggang January 30, 2010,  ang bilang ng Violation of Civil and Political Rights sa ilalim ng pamumuno ng dating Pangulong Arroyo ay umabot sa 1,206 na mga extrajudicial, summary and arbitrary executions. Meron din 206 na enforced or involuntary disappearance, 1,099 na kaso ng torture, 2,059 ang illegal arrests, 30,119 na physical assault and injuries, at 81,835 na kaso ng threat, harassment and intimidation, at iba pang paglabag sa karapatan ng tao. Sa madaling salita, ang mga violation of rights na nabanggit ay malinaw na paglabag, hindi lamang sa batas, kundi sa kalooban ng Diyos na pahalagahan ang tao na kanyang tanging likha. Kaya dapat lamang na mabigyan ng hustisya ang mga taong nalabag ang karapatan mabuhay ng maayos at walang takot sa ating lipunan.

------------------------------------------------------

Ang editoryal na ito ay mula sa panulat ni Melba Padilla Maggay, Ph.D. para sa Sa Ganang Amin. Ang Sa Ganang Amin ay kalipunan ng mga editoryal ng ISACC. Ginagawa ito sa pakikipagtulungan ng People’s Tonight, DZAS at AP Media. Para sa inyong komentaryo, maaaring mag-email sa This e-mail address is being protected from spambots. You need JavaScript enabled to view it. .