Noong panahon ng World War II, may mga bansang nagtangka na ibahin ang ritmo ng pagtatrabaho at pamamahinga. Nag-eksperimento na gawing dalawa o tatlong linggo na tuloy-tuloy ang pagtatrabaho at gawing sunod-sunod na tatlong araw ang pahinga. Hindi ito umubra. Napag-alaman na sadyang mas efficient ang mga nagtatrabaho sa mga pabrika o sa mga ospital kung nakakapagpahinga sila tuwing ika-pitong araw.

Bakit mahalaga sa tao ang pahinga?

Mapapansin na sa Genesis 1, pitong beses na sinabi ng Diyos ang ganito: ‘Pinagmasdan niya ang kanyang ginawa, at siya’y nasiyahan.’ At sa ika-pitong araw, ang Manlilikha ay nagpahinga. Binukod-tangi niya ang araw na ito at pinagpala.

Ang ‘Sabbath’ o Araw ng Pamamahinga ay mahalagang kautusan. Sa simula pa lang ng pagtatatag ng bansang Israel, kasama na ito sa Sampung Utos na nakasaad sa Exodo 20:8-10:

“Italaga ninyo sa akin ang Araw ng Pamamahinga. Anim na araw kayong gagawa ng inyong gawain. Ang ikapitong araw ay Araw ng Pamamahinga at itatalaga ninyo sa akin. Sa ikapitong araw, walang gagawa isa man sa inyo; kayo, ang inyong mga anak, mga katulong, ang inyong mga hayop o sinumang naninirahan sa inyong bayan.” Dahil mahigpit na ipinagbabawal ang paggawa sa araw na ito, gumawa ng napakaraming batas at alituntunin ang mga eskriba at Pariseo kung paano tutupdin ito. Ang legalismong ito ay bagay na madalas na maging sanhi ng kontrobersya sa pagitan ng mga Pariseo at ni Jesus noon.

Ano ang ibig sabihin ng mamahinga?

Sa ganang amin, hindi lamang ito paghinto sa mga pang-araw-araw na gawain upang makapagpanibagong-lakas. Ito ay araw ng pagtutuon ng ating buong pansin sa Panginoon. Sa araw na ito, iniimbitahan tayo na makilala muli siya at magkaroon ng panibagong pagtanaw sa  ating mga sarili at gawain.

Malasin kung paanong sa bawat yugto ng kanyang paglikha, pinagmamasdan at inisipat ng Diyos ang kanyang nagawa na at siya’y natutuwa. Mahalaga ang ganitong pag-distansiya at pagsusuri sa ating mga trabaho. Marami sa atin ang gawa lang nang gawa at hindi tinitingnan kung ayos ang trabaho o kung saan ito patutungo.

Ang Araw ng Pamamahinga ay ibinigay sa atin na pagkakataon upang tingnan, mula sa malayo, ang kahalagahan ng ating mga pinagkaka-abalahan sa buhay. Ito ay itinalaga upang mapagbulayan natin, sa harapan ng Diyos, ang tunay na saysay ng ating mga gawa.

Mahalagang pansinin na matapos lumikha ang Diyos, pinagmasdan niya ang lahat ng kanyang ginawa at lubos na lubos ang kanyang kasiyahan. Galak na galak siya sa natapos niyang gawa.

Ganito rin ba ang ating nararamdaman sa mga bagay na nililikha ng ating mga kamay? Umaasa kami, lalo na sa ating mga opisyal sa gobyerno, na sila ay tunay na nasisiyahan sa kanilang mga ginagawa, at kaya nila itong ipagmalaki, sa kasaysayan at maging sa kanilang kaapo-apuhan.

---------------------------------------------

Ang Sa Ganang Amin ay kalipunan ng mga editoryal ng ISACC. Ginagawa ito sa pakikipagtulungan ng People’s Tonight, DZAS at AP Media. Para sa inyong komentaryo, maaaring mag-email sa This e-mail address is being protected from spambots. You need JavaScript enabled to view it. .