“Puro salita lang ‘yan.” ‘Yan ang sinasabi natin sa mga tao o proyekto na sa palagay natin ay walang patutunguhan. Wala tayong bilib sa mga taong ang pangako ay napapako. Hindi rin tayo mahikayat sa mga gawaing di natin sigurado kung sadyang magagawa. Sa mga organisasyon at sa ating gobyerno, madalas maraming plano, lalo na sa simula ng taon. Kaya lang, wala tayong katiyakan kung maisasagawa nga ba ang mga sinabing gagawin.

Hindi ganito ang salita ng Diyos. Mapapansin sa ulat ng Genesis na ang kanyang salita ay makapangyarihan. Pag sinabi niya, sadyang nagagawa.

Sa simula, mayroon lamang tubig at dilim. Nang inumpisahan ng Diyos ang paglikha sa ating daigdig, ang ginamit lamang niya ay salita. Sa gitna ng kadiliman, sinabi lang niya, “Magkaroon ng liwanag!” At nagkaroon nga.

Ganito rin ang nangyari sa bawat yugto ng kanyang paglikha. Pansinin na ang pattern ay ‘ Sinabi ng Diyos....At Nangyari ito.’

Sinabi niyang magkaroon ng kalawakan na hahati sa tubig, at ito nga ay nahati na may bahaging itaas at ibaba. Tinawag niyang Langit ang kalawakang pumapagitna dito. Sinabi niyang magtipon-tipon ang tubig sa silong ng langit upang lumitaw ang lupa, at gayon nga ang nangyari. Tinawag niyang Daigdig ang lupa, at Karagatan naman ang itinawag sa nagsama-samang tubig. Sinabi niyang magkaroon sa lupa ng lahat ng halamang namumunga at nagbubutil, at tumubo nga sa lupa ang gayong mga halaman. Sinabi niyang magkaroon ng mga tanglaw sa langit, upang mabukod ang araw sa gabi. At nangyari nga na nalikha ang Araw upang tumanglaw sa maghapon, at ang Buwan at mga bituin para sa gabi. Sinabi niyang magkaroon ng laman ang tubig at himpapawid, at nalikha ang mga dambuhala at sari-saring isda sa dagat, gayundin ang lahat ng uri ng ibon. Sinabi niyang magkaroon ng lahat ng hayop sa lupa – maaamo, maiilap, malalaki at maliliit. At gayun nga ang nangyari.

Sa ganang amin, ang Salita ng Diyos ay hindi hiwalay sa kanyang gawa. Matutupad at magagawa ang lahat ng bagay pag sinabi niya. Kaya sa bagong taon na ating haharapin, maaari nating panghawakan ang bawat salita ng Diyos para sa atin, sa ating pamilya, sa ating simbahan, at maging sa ating bayan.

---------------------------------------------------------------------------

Ang editoryal na ito ay mula sa panulat ni Melba Padilla Maggay, Ph.D. para sa Sa Ganang Amin. Ang Sa Ganang Amin ay kalipunan ng mga editoryal ng ISACC. Ginagawa ito sa pakikipagtulungan ng People’s Tonight, DZAS at AP Media. Para sa inyong komentaryo, maaaring mag-email sa This e-mail address is being protected from spambots. You need JavaScript enabled to view it. .