WALA mang tahasang pag-amin mula kay Gerald Anderson tungkol sa estado ng kanilang relasyon ng pop princess na si Sarah Geronimo, inamin ng ex-boyfriend ni Kim Chiu na espesyal sa kanya si Sarah G. at gusto niya itong makilala pa nang husto.  Hindi man sila solo nung nakaraang Valentine’s day dahil kasama ang mommy ni Sarah na si Mommy Divine at ilang kaibigan, masaya si Gerald dahil magkasama sila nito.  Sa panayam ni Boy Abunda kay Sarah G. sa “The Buzz” noong nakaraang linggo, ayaw din nitong aminin kung nanliligaw na sa kanya si Gerald pero sinabi ng pop princess na espesyal sa kanya ang binatang aktor.

Samantala, nagpaalam na si Sarah G. sa kanyang “ASAP” family last Sunday dahil simula sa darating na linggo, February 26, 8 p.m. ay mapapanood na siya sa kanyang solo musical variety show, ang “Sarah G. Live” sa ABS-CBN kung saan si Luis Manzano ang kanyang magiging co-host kasama si Gab Valenciano and the G-Force with Louie Ocampo as musical director at si Erick Salud naman ang director.

COCO, TAKOT LIGAWAN SI JULIA

HABANG tumatagal ay lalong gumaganda ang takbo ng “Walang Hanggan” kung saan kinaiinisan ang mga character na ginagampanan nina Helen Gamboa-Sotto, Joem Bascon at Melissa Ricks.  Angat na angat naman ang mga papel na ginagampanan nina Coco Martin at Julia Montes na kahit halos doble ang agwat ng kanilang edad, hindi ito halata dahil napaka-boyish ng hitsura ni Coco at si Julia naman ay mukhang matured-looking at 16.  Dahil sa “Walang Hanggan,” mukhang napag-iwanan na ni Julia ang kanyang ex-`Goin’ Bulilit,”  “Mara Clara,”  at “Growing Up” co-star na si Katryn Bernardo na napaka-nene pa rin ng hitsura hanggang ngayon.

Samantala, ayaw tangkain ni Coco na ligawan si Julia dahil sobra pa umano itong bata at parati umanong nakabantay ang lola nito.  Ayon sa award-winning actor, gusto niya munang mag-focus sa kanyang career dahil kung magkaka-giflfriend man daw siya ngayon, tiyak na magiging unfair umano siya dahil sa kanyang very tight schedule.

Sina Coco at Julia ay parehong laki sa lola.

KUYA GERMS, PATULOY TUMUTUKLAS

SA “Master Showman: Walang Tulungan” ay patuloy si Kuya Germs Moreno sa pagtuklas ng mga bagong talino sa tulong na rin ng kanyang pamangkin at isa sa mga hosts ng programa na si John Nite.

Sa tinagal-tagal na ni Kuya Germs sa showbiz, alam niyang sumipat ng mga raw talents na puwedeng tanghaling malalaking stars balang araw tulad na lamang sa nangyari noon sa kanyang 10-year-old youth-oriented program na “That’s Entertainment” sa GMA na pinagmulan ng malalaking stars sa kasalukuyan.

Ang teen actor na si Jake Vargas ay isa sa mga discovery ni Kuya Germs sa “Walang Tulugan.”

DEREK, LILIPAT NA?

MAGI-EXPIRE na ang kontrata ni Derek Ramsay sa ABS-CBN sa buwang ito at may mga kumakalat na balita na lilipat umano sa ibang studio ang hunk actor at kasintahan ni Angelica Panganiban.

Kung dati-rati’y sunud-sunod ang mga TV projects ni Derek sa bakuran ng ABS-CBN, ngayon ay matagal-tagal na rin siyang bakante. Pero klinaro ng boyfriend ni Angelica na kung saka-sakali man daw na lumipat siya ng TV network, hindi ito dahil sa pera kundi dahil sa projects na kanyang gagawin.  Last TV project niya sa ABS-CBN ang “Magkaribal” and that was two years ago pa.  Mabuti na lamang at may dalawang hit movie siyang ginawa, ang “My Other Woman” with Anne Curtis at Cristine Reyes at “Praybeyt Benjamin” with Vice Ganda.