Kantiyaw ang inabot ni Cesar Montano sa press na nanood ng press preview ng Hitman sa My Cinema dahil sa love scene nila ni Sam Pinto na kung saan-saan nila ginawa.

’Pag napanood n’yo ang movie na showing na ngayon, makikita n’yo ang tinutukoy naming “kung saan-saang” puwesto.

Marami tiyak ang maiinggit kay Cesar dahil sa hot scenes nila ni Sam, pero sorry sila dahil ang actor-producer-director ng movie ang naka-devirginize kay Sam sa screen.

Napanood na ni Sunshine Cruz ang movie, kaya wala itong pagseselosan.

Sa premiere night kagabi lang napanood ni Phillip Salvador ang movie, curious kami sa reaction nito sa pagtawag sa kanya ni Cesar na “lolo” at pang-ookray na matanda na at mabagal nang tumakbo.

Pero katuwa ang eksena ’pag nilalaglag niya si Phillip at si Cesar lang ang makakagawa noon!

After the press preview, in-announce ni Cesar na may part 2 ang Hitman early next year na ang kanyang CM Productions pa rin ang producer at Viva Films ang magre-release.

Kasama pa rin si Sam, pero wala na sina Phillip, Joko Diaz at Mark Herras dahil tsugi ang karakter nila sa part one.

“I’m looking forward sa part 2, nanghihingi ng part two ang movie, kaya gagawan natin. Pero ang next project ko, action-comedy muna,” sabi ni Cesar.

* * *

Mukhang tinotoo ni Hayden Kho Jr. ang pag-alis sa Twitter dahil mula nang magpaalam siya sa followers niya kagabi, wala pa uli itong tweet.

Kaya lang, nag-quit siya sa Twitter after ilabas ang picture at letter ng bagong nali-link kay Dra. Vicki Belo na si Al Galang.

Kumbaga, the damage has been done nang bawiin niya ang mga sinabi at ang litrato.

Sabi nito: “In the height of my anger I tweeted those things and now, I regret it.        

“So, please allow me to fix this. I am saying this as plain & as simple as I can. Vicki NEVER cheated on me and about Nancy (Castiglione), it is also not true that we were dating or we’re having an affair.

“I hope that clears her name & my name as well. I hope this ends it all. Vicki did not cheat on me, I did not cheat on Vicki and Al & Nancy have got nothing to do w/ this.

“And so, finally & officially, I am quitting this Twitter account & abandoning my previous plan of going back to THAT world.” 

Showbiz ang sinasabing “THAT” world ni Hayden, dagdag pa nito, nag-usap na sila ni Al at nag-apologize ito sa kanya tungkol sa inilabas niyang letter nito para raw kay Vicki.

“I have forgiven him,” ani Hayden.

Nag-usap na raw sila ni Vicki at naniwala siya rito.        

Kaya lang, marami na ang nakabasa ng letter ni Al at nakakita ng picture nito bago niya ma-delete at na-save pa ng iba.

Paano niya tutulungan si Dra. Vicki na malinis ang pangalan?

* * *

Sa Nadala sa Alindog episode ng Personalan, pag-aawagan nina Alma Atanante at Roselyn Gamata kay Pido Mojares ang tema.

Kahit nasampal at sinabunutan na ni Alma si Roselyn nang unang mahuling nakikipaghalikan kay Pido, hindi pa rin tumitigil ang dalawa sa bawal nilang relasyon.

Sa harap ng host ng Personalan na si Ali Sotto at gabay sa buhay na si Dr. Ali Gui, masasagot kung bakit ayaw tigilan ni Pido si Roselyn at bakit patuloy na nagpapa-tawad si Alma. Mapapanood ang show, 7:10 p.m., sa GMA News TV Channel 11.

* * *                                                                        

Sa Alice Bungisngis, mapupunta si Esme (Jean Garcia) sa Gaway-Gaway para hanapin si Alice (Bea Binene) nakapagbalik sa kanya bilang tao.

Magkakakilala sina Ace (Jake Vargas) at Ipeng (Boboy Garovillo) sa ampunan at bibigyan ng una ang huli ng cap.

Gagamutin ni Alice si Doray at makakakita na ito. Maririnig ni Alice si Wally (Marc Justine Alvarez) at matutuwa dahil first time may taong makakarinig sa kanya.

* * *

Sa My Beloved, sa tulong ni Lucy (Djanin Cruz), susubukan ni Monica (Jennica Garcia) na kausapin si Junic (Carl Guevarra) thru’ Spirit of the Glass, pero bigong makausap ni Monica ang kaluluwa ni Junic.

Ipapagawa ng simbahan kay Sharina (Marian Rivera) ang santo na Kristong Hari, ito ang next target ng grupo ni Gimo (Paolo Contis) na nakawin. Mahuhuli sila ni Sharina, pero tila buhay niya ang kapalit.