Back to work na si Diether Ocampo matapos ang huli niyang teleserye sa ABS-CBN na Guns & Roses last year. Muli siyang mapapanood sa Lorenzo’s Time, bagong primetime drama series na papalit sa timeslot ng Budoy.

Ang nasabing serye ay pagbibidahan ni Zaijian Jaranilla at excited si Diet sa project since first time niyang makakasama ang child superstar.

“Lorenzo’s Time is a family drama, medyo light compared sa nakakapagod na Guns & Roses. At malaking pasasalamat ko sa ABS-CBN dahil siyempre, bihirang makakuha ng ganitong project na hindi lang basta teleserye, you know, we can actually tell a good story, not just a story na ordinary but ’yung story na mayroong values na maise-share sa manonood,” sabi ni Diet nang makausap namin sa promo shoot ng serye na ginanap sa Studio 8 ng ABS-CBN.

Ginagampanan ni Diet ang role na lead vocalist ng isang rock band, leading lady niya si Carmina Villaroel at ang nakakatuwa, karibal niya si Zaijian. Kung paano mangyayari ito, ani Diet ay ‘yun daw ang dapat aba-ngan.

“Bale nu’ng nakilala ko ’yung karakter ni Zaijian na si Enzo, nagkaroon pala sila ng past ni Jenny (Carmina), so maganda ’yung magiging chemistry nito, very interesting ’yung chemistry ng tatlong karakter dahil siya, parang nalipasan siya ng panahon pero kung ano ‘yung nararamdaman niya para kay Jenny, genuine,” kuwento ni Diet.

Masaya raw katrabaho si Zaijian at kahit bata ito ay marami raw siyang natutunan dito and vice versa.

“Kasi minsan ’di ba, as we mature, we take life so seriously, so, kailangan, take life lightly.”

So, natutunan niya kay Zaijian na maging bata uli?

“Oo, ’di ba, kasi at a very young age, kailangan ko nang magtrabaho, eh, para maitaguyod ko ’yung pamilya ko.”

Siyempre, hindi maiwasang maitanong ang friendship nila ni Kris Aquino na parang biglang nag-lie-low at sey niya, magkaibigan pa rin na-man daw sila hanggang ngayon,

“Kanina lang, binisita ko siya sa set, eh. Kami naman, kahit hindi kami nagkikita, automatic ’yan, we’re always there to support each other.

“Hindi naman nahinto ang friendship. Hindi lang kami nagkikita masyado kasi busy siya, busy ako. Ganu’n lang. The time that we were together was when we we’re doing Dalaw, after that we were doing a lot of mga charity activities, mga projects. We were in Tarlac and also in Bacoor.”

Ano ang naramdaman niya nang unang mabalitaan niyang annulled na si Kris?

“She actually sent me a message na ’yun nga, she is officially free. I’m very happy for her, siyempre. Sabi ko nga, what I can tell you is it’s time for you to start a beautiful story, ’di ba?”

Ano ang masasabi niya sa isyung ayaw sa kanya ng mga ate ni Kris dahil masyado siyang guwapo?

“Wala, wala namang ano… I mean, we’re friends at ’yung family niya, kilala ko rin naman. We were together with some of the projects kasi ’yung pinsan niya, is in Kids Foundation, that’s why, we’re very much in touch with their family.

Nanligaw ba siya talaga kay Kris?

“Kaibigan ko pong matalik si Kris. Pero ipapaalam ko po sa inyo kung manliligaw ako,” nangingiti niyang sabi.

Wala raw siyang love life ngayon at pa-date-date lang muna. Hindi pa raw siya pinapalad na magkaroon talaga ng masasabing steady girlfriend dahil na rin daw siguro sa trabaho niya.

* * *

Muling humakot ng parangal ang late-night current affairs program ng ABS-CBN na The Bottomline with Boy Abunda sa ginanap na 8th USTv Students' Choice Awards at Gandingan: The UPLB Isko’t Iska’s Broadcast Choice Awards kamakailan.

Kinilala ang Bottomline bilang Students’ Choice of Public Affairs–Talk Show Program sa USTv Awards at Best Development-Oriented Talk Show sa Gandingan.

Pinarangalan rin ang host ng programang si Boy Abunda sa Gandingan bilang Best Development-Oriented Talk Show Host.

Ang USTv Awards ay taunang parangal ng University of Sto. Tomas (UST) na kumikilala sa kagalingan ng mga programa at personalidad na nagtataguyod ng Thomasian values at mga turo ng Katoliko.

Samantala, ang Gandingan Awards naman ay ang awards program ng University of the Philippines Los Baños (UPLB) na nagbibigay din ng parangal sa mga programa at personalidad na nagtataguyod naman ng mga isyu para sa kaunlaran.

Ang tatlong parangal ay dagdag patunay lamang sa kalidad at kagalingan ng nasabing programa ng Asia's King of Talk.

Matatandaang kinilala rin ang Bottomline bilang Best Talk Show for 2011 sa prestiyosong 16th Asian TV Awards kung saan tinalo nito ang anim na palabas ng ibang bansa sa Asya kabilang ang CNN Hong Kong at New Delhi TV ng India.

Regular na napapanood ang The Bottomline with Boy Abunda tuwing Sabado ng gabi, 11:30 p.m, pagkatapos ng Banana Split sa ABS-CBN.