MALAKI ang iginanda at mas naging sexy ngayon ang young actress na si Danita Paner.

Nasaksihan namin ito nang dumalo kami sa grand launch ng bagong palabas ng TV5 kamakailan sa The Fort, Taguig City.    

Biniro nga namin si Danita na kung kailan  naghiwalay sila ng landas ng ex-boyfriend na si JC de Vera, saka naman nag-bloom ang kanyang beauty.

Susog pa namin, hindi kaya mga problema lang ang naranasan niya noong sila pa ni JC?

Natatawa namang sinabi ng bida sa afternoon soap ng TV5 na Isang Dakot na Luha, in fairness naman daw sa dating kasintahan, naging masaya naman siya sa piling nito.

‘Yun nga lang daw, dumating na sa puntong kailangan nilang maghiwalay at naging maganda naman daw ang kanilang parting ways.

Naitanong din namin kay Danita na sakaling balikan siya ni JC,  lalo pa nga’t ang ganda at sexy niya ngayon, tatanggapin pa kaya niya ang aktor? 

Sagot ng dalaga ni Daisy Romualdez, malabo na raw ang balikan nila sa ngayon, pero hindi naman daw siya nagsasalita ng tapos.

Para kay Danita, naka-focus muna siya sa kanyang showbiz career. Lalo sa bago niyang project sa TV5 na ipinagmalaki pa ni Danita na may mga sexy scenes siya na first time niya gagawin.

Katwiran ni Danita, hindi na rin naman siya bata para magpa-tweetums at ready na raw siyang sumabak sa daring na mga role.    

Nu’ng matanong namin kung may nag-alok na rin sa kanya na magpa-sexy sa men’s  magazines, inamin ni Danita na mayroon daw. Pero hindi pa niya matanggap kasi feeling  niya, hindi pa siya handa sa mga sexy pictorials.    

*  *  *

KAYOD-KALABAW naman daw ang drama ng broadcaster na si Paolo Bediones sa Kapatid Network.

Pero happy naman daw siya, kasi nga  mukha na ni Paolo ang bubulaga sa TV5 sa pag-uumpisa ng kanilang programming via Good Morning Club, Lunes hanggang Biyernes. Tapos sa gabi naman, sasalang si Paolo bilang newscaster ng late night news na Pilipinas News.

Sa Linggo ng gabi, mayroon pa siyang USI (Under Special Investigation) at magiging host ng reality game shows na Extreme Makeover Home Edition Philippines, bukod sa pagsalang niya bilang radio broadcaster sa radio station ng TV5.

So, halos jingle na lang ang pahinga ni Paolo, huh!

Inamin din ni Paolo na pag-uwi niya sa gabi, sa kotse na lang siya natutulog at pagdating sa kanilang bahay, ligo at palit na lang ng damit ang kanyang ginagawa para sa morning show niya na nagsisimula sa alas-5:30 ng umaga.