SAYANG at hindi dumating si Edu Manzano sa grand launch ng mga bagong show sa TV5 which highlighted his “Game and Go” show with Shalani Soledad-Romulo, Arnell Ignacio among others.

Nabuksan kasi ang topic tungkol sa kasong isinampa ni Arnel, with the help of Edu, laban sa dalawang highway patrol officers na nang-harass sa kanya at nangotong pa ng P50 thousand pesos.

“Hindi ko talaga na-expect ang mabilis na pagsaklolo sa akin ni Edu  para makasuhan ang dalawang pulis na ‘yon at tuluyang ma-dismiss sa serbisyo,” ani Arnell. “Napanood lang ako ni Edu na ini-interview sa TV tungkol sa pangyayari at awang-awa siya sa akin. Bago ako nakaalis ng police station nang mga sandaling iyon, nakatanggap na ako ng tawag sa kanya at nag-meet kami. Binigyan niya ako ng dalawang abogado. Siya ang nagbayad lahat. Natulala ako sa pagmamalasakit niya.

“Iyon pala ang isa sa mga ipinakikipaglaban ni Edu kahit private citizen siya at wala sa gobyerno. Galit siya sa mga corrupt sa gobyerno. Nagkaroon ako ng lakas ng loob. Hindi ko pinairal ang galit ko. Nagpaka-hinahon ako lalo na nang mag-report ako sa police station. Hindi ako nagpakita ng galit kahit nang makita ko ang dalawang pulis doon. Hindi ako nag-eskandalo, basta diretso lang ako sa hepe nila kung saan ako may appointment. Bilib din ako kay Gen. Espina dahil straight siya. Gusto niyang lumabas ang totoo at hindi niya pinatagal ang kaso.”

Kaya, tuwang tuwa si Arnel nang makasama sa “Game and Go” show. “Hindi lang siguro nakarating si Edu dahil kasalukuyang nama-malantsa,”  biro niya. “Konting lukot sa pantalon, pinapa-plantsa agad,” patuloy niya at nakuha pang humalakhak.

Napag-usapan din ang tungkol sa kanyang daily show on TV 5, sa 92.3FM tuwing madaling araw  2:30 hanggang 4.a.m. co-anchor  niya sina Pilar Mateo at Madam Venus.

“Malawak na yata ang naabot (ng show) kahit madaling araw na. Dahil  doon, ipinatawag ako ng U.P College of Law para sa aking mga opinion. Naimbitahan na rin ako na dalawin si former President Gloria Macapagal-Arroyo. Nakakaawa din,  parang robot na ang galaw ng kanyang leeg.”

SARAH, LATE NA ANG LOVELIFE

HABANG nakatuon ang pansin ng lahat kay Sarah Geronimo sa Q and A portion ng bagong show niyang “Sarah G: Live!” na magsisimula na sa Feb. 26 (after “Rated K” at bago ipalabas ang “PBB Unli Night” sa Channel 2) si Mommy Divine   naman  (ni Sarah) ang inaatupag ng mga katabing movie press people sa halip na anak nito.

“Sino ba ang mas mayaman sa inyo ngayon ni Corona (meaning CJ Renato Corona) sino ang mas malaki ang dollar account?

“Ano ba ‘yan,” natatawang sagot ni Mommy Divine.

Next question: “Hindi ka ba kinakabahan kay  Gab (Valenciano, co-host ni Sarah )?  Matinik ‘yan sa chicks…”

Hindi naman naligalig si Mommy Divine. “Mabait na bata si Gab. Anak siya ni Gary V at  Angeli na mga relihiyoso.”

Nagpakitang-gilas naman si Sarah sa Q and A. Anya: “Napa ka-open ko na ngayon at nagpapaka-totoo.  Pero sana, huwag naman  masyadong nakakatakot na revelations ang ipapagawa sa akin. Kasi kailangan, maging bolder daw ako.”

Ang tanging kilig moment (actually, it turned out to be sour) ay ang lihim na pakikipag-relasyon ni Sarah kay Rayver Cruz na nang mabunyag ay nagdulot ng first major heartbreak niya. Almost there  na rin sana ang sumunod na kabanata ni Sarah with Gerald Anderson, pero,  naudlot pa. Kung naglilihim lang sila ngayon, malalaman natin ang totoo.

Medyo, late na kasi ang pagkakaroon ng lovelife ni Sarah na 24 na ngayon.