SABAY nagpa-presscon nu’ng Huwebes, pero sa magkaibang oras ang magka-loveteam at bida sa Budoy TV series na sina Jessy Mendiola at Gerald Anderson.

Tanghali nang humarap sa selected press si Jessy para sa kanyang Bubba Tealicious endorsement. Si Gerald naman ay nu’ng dinner para naman sa presscon ng Mint clothing line kung saan siya ang newest endorser.

Sa presscon ni Jessy, ipinatikim sa press ang iba’t ibang flavors ng bubble tea na nagustuhan naman ng lahat. Ang kagandahan sa Bubba Tealicious, mas mura itong ’di hamak kumpara sa iba.

“Mas healthy po itong inumin and this is already part of my regular diet. Every morning, I drink fresh cup of milk tea,” kuwento ni Jessy.

Samantala, kahit mag-kapareha sa Budoy sina Jessy at Gerald, hindi sila nali-link sa isa’t isa. Wala ring napapabalitang nanliligaw ngayon sa dalaga.

“Sa work po muna ako naka-concentrate ngayon, eh. At saka, wala rin akong time if ever ma-in-love ako,” pag-amin niya.

* * *

GOING back to Gerald, ilang taon din pala siyang niligawan ng may-ari ng Mint para maging endorser. Pero dahil may kontrata pa siya noon sa Bench, bawal pa siyang tumanggap ng iba.

Si Jericho ang pinalitan ni Gerald sa Mint. Pero kasama rin niya as additional endorser si Xian Lim.

During his presscon, napaamin ang binata na nag-date sila ni Sarah Geronimo nu’ng Valentine’s Day sa isang KTV bar. Kaya lang, group date lang daw ito. Marami raw silang kasama.

Pagkatapos ng pag-amin, hindi na nagdagdag pa ng ibang detalye si Gerald tungkol sa kanilang date ni Sarah.

Medyo nakakaramdam naman ng pagkalungkot si Gerald dahil huling tatlong linggo na ng Budoy.

“Last three weeks na namin at talagang nakaka-lungkot na matatapos na ang Budoy. Pero ’yung aral na na-impart sa tao ng series, alam namin na hindi ’yon matatapos,” sambit pa ng binata.

Take note, kahit nagtagal ang samahan nina Gerald at Jessy sa Budoy, hindi talaga sila na-develop sa isa’t isa.