Isa si Councilor Shalani Soledad-Romulo sa hosts ng bagong game show ng TV5 na Game ’n Go with Edu Manzano bilang main host at kasama rin nila sina Arnell Ignacio, Gelli de Belen, Tuesday Vargas, Pretty Triszha at April "Congrats" Gustillo.

Sa bonggang launching ng TV5 para sa mga bagong show kabilang na ang Game ’n Go sa NBC Tent sa The Fort last Tuesday, isa sa mga dumalo si Shalani kaya nakapanayam siya ng entertainment press.

Sa nasabing panayam,  nilinaw ng press sa bagong kasal na konsehala kung totoo ang napabalitang nag-iiyak siya nang sabihin  ng business unit head ng Wil Time Bigtime na si Jay Montelibano na tsugi na siya as co-host sa nasabing show ni Willie Revillame.

Ayaw nang magsalita pa ni Shalani at mas gusto niyang pag-usapan na lang ang bagong game show.

"I think in life, there are some things na when it hits you, medyo malungkot. But then, you also have to move on, you also have to be thankful for other opportunities that are being given you,” pahayag ni Shalani.

Nang tanungin kung nagkausap na sila ni Willie, wala ring diretsang sagot ang konsehala.

"With regards to Wil Time Bigtime, I think it would be better to ask them also for specifics. I've spoken with our business unit head and I've said, alam naman nila, sinabi ko rin that TV5 is offering me a show and I also told them that I'm considering accepting it.”

Iba rin ang sagot ni Shalani nang tanungin kung nagkaka-text sila ni Willie.

"Ako, I have nothing but gratefulness, really, for the show,” say niya.

Matatandaang pansamantalang nag-leave si Shalani last January sa show para sa kanyang kasal with Congressman Roman Romulo kamakailan.

Ang alam ng marami, babalik pa siya sa show, pero hindi na nangyari ito dahil tinanggal na nga siya at ang sinasabi umanong dahilan ay hindi na kikiligin ang mga manonood sa kanila ni Willie at hindi na siya mabibiro dahil may asawa na nga siya.

Samantala, mapapanood na ang Game ’n Go ngayong Marso at makakabangga nila ang It’s Showtime at Eat Bulaga sa tanghali.

Pero say nila, hindi sila nakikipagkumpetensiya aside from the fact na game show ang sa kanila at hindi talaga variety show tulad ng mga katapat.

Bukod sa Game ’n Go, kasama rin sa mga bagong show ng Kapatid Network ngayong first quarter ang Good Morning Club, isang morning show na pangungunahan nina Cheryl Cosim, Martin Andanar at Paolo Bediones, Valiente nina Oyo Sotto at JC de Vera, Nandito Ako starring David Archuleta, Jasmine Curtis and Eula Caballero, Felina ni Arci Muñoz, Isang Dakot na Luha ni Alice Dixson, Kapitan Awesome, Toink Sino ang Tama and Extreme Makeover Home Edition Philippines, among others.