TALAGANG dibdibang kina-karir ni Manny Pacquiao ang pagiging Ambassador of Goodwill ng Catholic Church.

Matapos niyang ipakitang lagi siyang laman ng simbahan,  iniisa-isa naman niyang baguhin ang kanyang mga kinagawian.

Unang tinanggal ni Pacman sa kanyang bokabularyo ang pambababae.

Kung noon ay hayagan ang pagiging chickboy ni Manny, ngayon na nabigyan siya ng katungkulan ng CBCP, inuna niyang ipinangako na hindi na siya mambababae at ang kanyang puso at isipan ay para lang sa misis niyang si Jinkee at mga anak na lamang.

Ayon na rin sa Pambansang Kamao, lahat-lahat din ng mga “bisyo” niya ay tinigilan na niya.

Tulad ng pagiging tomador at sabungero, kung saan milyun-milyung piso ang  kanyang ipinapatalo.

In fact, ang libu-libo raw na mga imported at mamahaling mga manok na panabong ni Pacman ay kanya nang ipinamigay.     

Kung hindi kami nagkakamali, nagkakahalaga nang halos isandaan milyong piso ang ginagastos ni Pacquiao sa sugal na sabong at pag-aalaga ng mga manok na panabong.

Ang bawat isang manok niyang panabong, na ipinamigay umano ni Paquiao ay nagkakahalaga ng P15 thou hanggang P50 thou, depende sa klase at uri.

One hundred percent clean living na raw ang ginagawa ngayon ni Pacman, kaya mistula na raw itong pastor na laging may dala-dalang Bible.

Kadalasan, kapag wala raw sesyon sa Kongreso, nasa Bible study si Pacman.

Kung may mga labis daw na natutuwa sa mga ginagawa ngayon ni Paquiao, nangunguna na ang kanyang asawang si Jinky at mga anak na madalas nang nakaka-bonding ni Manny ngayon.

Pero may mga labis namang nalungkot sa pagbabagong-buhay ni Manny.

’Yun ’yung ilang mga taong nakapaligid sa kanya na nagdadala ng tukso sa Pambansang Kamao.

*  *  *

MALAKI ang paniniwala namin na isa sa mga best friend at kumpare ni Manny Pacquiao ang naging inspirasyon nito para tumigil na sa pambababae.

At aming napag-alaman na ito ay ang kaibigan din namin na singer-composer na si Lito Camo.

Hindi  lingid kay Pacman ang pagiging mabuting ama at tapat sa asawa ni Lito.

Noon, umaming babaero rin si Lito pero nagsisi na raw siya at tuluyang nagbago.

* * *

YOUNG ACTOR RAYMOND MANUEL MAGALING DIN NA SINGER AT COMPOSER

HINDI kami nagtataka kung bakit binigyan agad ni Sen. Bong Revilla ang 18-anyos guwapong young actor na si Raymond Manuel ng break sa movie niyang PANDAY  2.   

Napaka-talented pala kasi nito. Bukod kasi sa husay nitong umarte, magaling din pala siyang singer at composer.

Napakasuwerteng tinedyer, dahil nu’ng magsabog ng talento ang Diyos, nasalo yata lahat ni Raymond.