HINDI nagsisisi si Alden Richards sa paghinto sa pag-aaral at pakikipag-break ng kanyang girlfriend nu’ng pumasok siya sa showbiz.

Kaya raw nag-aaral ang isang tao para makapagtrabaho at may trabaho na raw siya ngayon, ang pag-aartista.   

Tungkol naman sa paki-kipaghiwalay ng kanyang dating dyowa, marami naman daw magagandang babae sa showbiz na  karapat-dapat ibigin. 

Kaya lang daw, ayaw pa niyang manligaw ulit dahil  gumagawa pa lang siya ng pangalan bilang artista.

“Hilig ko kasi ang pag-arte. Ngayong binigyan ako ng pagkakataon ng GMA7, dapat lang pagbutihan ko. Ayaw kong magkaroon ng sagabal na ibang bagay sa pag-aartista ko.    

“Sa totoo lang, crush ko talaga si Sam Pinto. Pero palagay ko  hanggang  ganu’n na lang muna. At kung anuman ang  nararamdaman ko para sa leading lady kong si Louise delos Reyes sa My Beloved, hanggang  du’n na  lang din muna,” say ni Alden nang makapanayam namin.

Inamin din ni Alden na high school pa lang, nagka-girlfriend na siya at naka-apat na raw siyang dyowa. Ang pinaka-serious daw, ‘yung huli dahil nasa college na siya. Nagkahiwalay daw sila dahil nawalan na nga siya ng panahon mula nang pasukin niya ang showbiz.

Katwiran ng young actor, pana-panahon ang pag-ibig. Nakapaghihintay daw ang puso, pero ang opportunities, hindi.

Silang dalawa ni Louise delos Reyes ang mag-partner sa  My Beloved.

At kahit support role lang silang dalawa sa pangunahing bida na sina Marian Rivera at Dingdong Dantes, okey lang daw kay Alden dahil sa primetime na sila napapanood ni Louise.

*  *  *

SPEAKING of Louise delos Reyes, hindi raw siya nagtatampo sa GMA7 na hindi agad nasundan ang  solo soap niyang Alakdana, na nagsilbing big break nila ni Alden bilang mag-partner.    

Katwiran ni Louise, tatlong pelikula naman  ang  nagawa niya  pagkatapos ng  Alakdana.    

At dahil maluwag na ang schedule ni Louise,  naipagpatuloy niya ang kursong Foreign Service  sa Lyceum of the Philippines sa Trece Martirez, Cavite.

*  *  *

NATUKLASAN ang batang biriterang si Roseanne Magan sa mga amateur singing contest sa Mandalu-yong City.

Madalas namin siyang mapanood na nagi-guest sa  isang programa sa Market Place Mandaluyong, sa may Kalentong St., kung saan host si Kagawad Carlito Cernal. Weekly show ito ni Carlito sa Market Place at isa siya sa mga nanghikayat kay Roseanne na mag-audition  sa GMA7 para sa bi-ritera role.

Nagtagumpay naman si Roseanne at siya nga ngayon ang bidang bata sa Biritera.