TANGGAP ng sexy actress na si Stef Prescott, isa sa tatlong finalists ng Survivor Philippines Celebrity Doubles Showdown kung hindi man siya ang nanalong Sole Survivor sa katatapos na Live Finale nitong Biyernes (Feb. 10) ng gabi.

Sinabi ni Stef na deserving daw si Albert ‘Betong’ Sumaya  na manalo  at mag-uwi ng P3-M grand prize dahil sa lahat daw ng mga castaway,  at sa sampung natirang finalists, si Betong ang may ‘pinakamalaking puso’ kaya siya ang ibinoto ng pitong judges.

Bagama’t may halong pagkadismaya na ‘di nanalo ng tatlong milyon piso, kontento naman daw si Stef dahil naging  unforgettable  experience sa kanya ang pagsali sa Survivor Philippines Celebrity Doubles Showdown. Nagkaroon daw siya ng panibagong mga kaibigan, at higit sa lahat, napalapit siya sa matagal na niyang crush na si Richard Gutierrez, na siyang host ng said show. Aminado si Stef na nakakilig ang kaguwapuhan ni Richard. At nang matanong kung feel niya itong makasamang matulog o makatabi sa kama, willing daw siya.

Samantala, nilinaw ni Stef ang tsikang hanggang sa finale raw ng Survivor Philippines: Celebrity Doubles Showdown ay nagkakairingan pa rin sila ng mahigpit na katunggali nila ni Betong  na si Mara Yokohama.  Ayon kay Stef, kahit pa raw naging mahigpit silang magkalaban sa isla at madalas ang iringan, nauwi rin sa tunay na pagkakaibigan ang kanilang samahan. Wika pa ni Stef, anuman daw ang naging iringan nila ni Mara sa isla ay iniwan na nila doon pagkatapos ng showdown.

*  *  *

SPEAKING of Survivor Philippines: Celebrity Doubles Showdown Live Finale na ginanap nitong Friday, muntik nang himatayin sa kaligayahan si Betong nang siya ang ideklarang sole survivor.

Ang napakaraming mga tagahanga n’ya namang nasa Studio 7 ng GMA ay nag-tayuan sabay sigawan sa tuwa. Nang ibigay sa kanya nina GMA7 President-CEO Atty. Felipe Gozon at COO Jimmy Duavit ang premyong  P3-M, naiyak na naman si Betong habang tinatawag niya sa stage ang kanyang mother na nanonood din sa Studio 7.

*  *  *

TILA naging ‘malalim’ ang sugat na dulot ng hiwalayan ng landas ng dating mag-syotang Kylie Padilla at Aljur Abrenica.

Una na rito ay ang hindi pagdalo ni Aljur sa party para sa kaarawan ni Kylie, na regalo ng kanyang amang si Robin Padilla, na ikinaiyak ng young actress.

Pero, ayon  kay Kylie, sa isang panayam,  walang kinalaman si Aljur sa kanyang pag-iyak sa kanyang birthday party. Luha daw ‘yun ng kaligayahan sa pagdalo ng mga kaibigan na   matagal na niyang hindi nakikita.

Pangalawa, paulit-ulit na sinasabi ni Kylie na hindi na muna siya makikipag-boyfriend hanggang hindi raw siya nanalo ng best actress award, na malamang ang gustong palabasin ni Kylie ay ‘nakabuti’ sa kanya ang break-up nila ni Aljur dahil nagka-acting award siya.