Sa contract signing niya bilang endorser ng Extraderm soap, inamin ni Lovi Poe ang pagwu-walk-out sa Party Pilipinas last Sunday dahil nagulat sa pagdating ni Ronald Singson para batiin siya ng happy birthday.

“I appreciate the gesture and it was sweet of him, but I was caught off-guard and I was really surprised. The staff apologized to Tito Leo (Dominguez). But we’re not together, focused ako sa work ko ngayon, sabi ni Lovi.

Babalik pa ba siya sa Party Pilipinas?

“I love the show and the staff and I know they just wanted to surprise me and their intentions were good. I’m not holding anything against them.”

Sabi ni Leo, hindi nag-walk-out si Lovi, pero nagulat siya na wala na ito sa studio at nabanggit na tawag nang tawag sa kanya si Ronald, pero hindi na sinabi kung bakit.

Sa Saturday ang 23rd birthday ni Lovi, pero wala siyang party, lalo’t may road show ang Legacy sa Friday at Saturday.

Samantala, may gagawing pelikula si Lovi, pero hindi sa Regal Films at hindi rin sa Viva Films. Tama ba ang hula naming sa GMA Films may offer ang aktres?

* * *                                                                    

Mukhang sasabayan na ni LJ Reyes ang pagpapa-sexy ng partner niyang si Paulo Avelino dahil sa presscon ng The Good Daughter, ibinalitang may sorpresa siya sa March.

Kahit hindi nagbigay ng clue, ang hula ng press, kundi may endorsement siyang sexy ang billboard, magko-cover siyang muli sa men’s magazine at alam daw ito ni Paulo.

Maganda ang sagot ni LJ kung ’di siya nai-insecure sa pagpapa-sexy ni Paulo sa Bench pictorial nito.

“Bakit, may boobs ba siya?” sabay tawa.

Back to school si LJ, tatapusin nito ang Economics course sa La Salle at kahit hirap sa schedule dahil may taping ng The Good Daughter at inaasikaso pa si Aki, ginagawa ang lahat para walang schedule na mag-suffer.

Sa Monday pa ang pilot ng The Good Daughter. Si Mike Tuviera ang director nito.

* * *                                                               

Maganda ang color coordination ng damit ng cast ng My Beloved dahil according sa role na ginagampanan nila.

Naka-white ang mababait ang role, gray ang suot ng between mabait at masama, si Marian Rivera lang ang naka-red, black ang kontrabida at ’yun ang kulay ng damit ni Katrina Halili.

Reunion nina Katrina at Marian ang My Beloved at masayang ikinuwento ng una na mas okey ang pagsasama nila ngayon.

Sa Marimar, nag-uusap lang sila sa eksena nila, pero ngayon, nagbabatian at nag-uusap na.

“Friends na friends na kami ngayon at wala nang makakasira sa friendship namin,” masayang sabi ni Katrina.

Nilinaw pala ni Katrina ang tsikang nagbenta siya ng lupa sa El Nido, Palawan. Hindi raw totoo ’yun at never  niyang ibebenta ang lupa niya dahil tumataas ang presyo at dito niya gustong tumira ’pag wala na siya sa showbiz.