Dinayo ng entertainment press ang Lipa City, Batangas, para sa press launch ng bagong teleserye ng TV5 na Valiente.

Sa Leviste Farm ginanap ang presscon na siya ring location ng taping at ginagamit na Villa Braganza.

Pinalakpakan ang trailer ng serye na idinidirehe ni Joel Lamangan. Dito pa lang, makikita nang malaking project ito at ginastusan ng TV5.

Kumpleto ang cast ng serye kamakalawa. Sina Oyo Sotto at JC de Vera ang magkaibigang gumaganap sa dating papel nina Michael de Mesa at Tirso Cruz III.

Leading ladies naman sina Nadine Samonte at Niña Jose.

What makes the soap more interesting ay ang pagsasama ng dating mag-asawang Michael de Mesa at Gina Alajar gayundin ang dating magkarelasyong sina Jaclyn Jose at Mark Gil.

First time na mapagsama-sama ang apat at curious ang lahat na malaman kung kumusta sila sa set at kung paano sila napapayag na magsama-sama.

Nang makatsikahan namin si Jaclyn, ito agad ang itinanong namin.

Ayon sa aktres, siyempre, tinanong  muna siya ng network kung okay sa kanya na makasama si Mark.

“Kasi, siyempre, iniiwasan nila ’yung delay ng trabaho. Sabi ko, okay lang, mamamatay naman siya, eh,” sabi ni Jaclyn. Tawanan tuloy lahat.

Sa istorya kasi, mag-asawa sila at maagang mamamatay si Mark. Sa pangatlong episode pa lang daw, tsugi na ito although matagal naman ang taping.

’Yun daw talaga kasi ang story.

Pero Jaclyn revealed na hindi pala sila okay ni Mark sa taping. Hindi raw siya kinakausap ng aktor at hindi raw niya alam kung ano ang problema nito sa kanya.

“Hindi ko alam kung bakit hindi kami maging civil man lang. Ewan ko sa kanya! Parang kung ituring niya ako, eh, parang... parang hindi kami nagkaanak, eh. Para siyang galit sa akin, parang asar,” sey niya.

Komento ng iba, baka dahil may pagmamahal pa sa kanya si Mark.

“Hindi. Baka inggit,” sey ni Jaclyn sabay tawa. “Kasi maganda ako kesa sa kanya,” dagdag pa niya.

Sabagay, kung ikukumpara nga, blooming na blooming si Jaclyn habang marami ang nakapansin na parang tumanda si Mark.

Sa set daw, nag-uusap lang sila ’pag take at pagkatapos, dedmahan na.

“Ewan ko nga kung bakit ganu’n, eh. Minsan nga, kumprontahin ko ’yan. Tatanungin ko lang, ‘ano ang problema mo sa akin?’ Ever since, ganyan na, eh. When we see each other, we say ‘hi’ lang.”

Samantala, kinumusta rin kay Jaclyn ang first apo,  anak ni Andi Eigenmann, at say niya, sobrang cute ang baby at napakasarap nang may apo.

“Naynay” daw ang ipatatawag niya kay Adriana Gabrielle (name ng baby girl ni Andi) dahil katwiran niya, sinabihan siya ni Direk Joel na huwag patatawag na lola.

Amerikanang-Amerikana raw ang hitsura ng baby at parang si Andi rin noong maliit.

As we all know, may American blood itong si Jaclyn habang ang ama naman ni Andi na si Mark ay may German and Spanish blood.

May nakuha naman daw si Gabrielle (nickname ng baby) sa ama nitong si Albie Casino tulad ng mata.

Hanggang ngayon, galit pa rin si Jaclyn sa ama ng baby ni Andi. Hindi raw niya makakalimutang sinira nito ang buhay ng kanyang anak except for the fact na nagkaroon nga sila ng cute na Gabrielle.

Lagi raw niyang pinapayuhan si Andi na may future pa rin ito kahit nandiyan na si Gabrielle.

“Kasi noong una, pakiramdam niya, it stops from there, eh. Pero sabi ko, hindi. Sige, gawin mo pa rin ang mga pangarap mo kahit nandiyan si Gabrielle. Bilib din ako sa batang ’yun, nakayanan niya lahat.”

Sa tingin daw niya, nakalimutan na ni Andi si Albie.

“Mas ako pa ’yung bitter, eh. Kasi siyempre, ’di ba, ginanu’n mo ang anak ko, inalagaan kong mabuti ’yan, nagpakahirap akong magtrabaho, tapos bubuntisin lang niya at aabandonahin?

“The minute he found out (na buntis si Andi), iniwan niya, eh. Tapos siniraan niya nang siniraan sa Twitter. Parang naging playgirl lumabas ’yung anak ko, eh, wala namang naging boyfriend kundi siya.”

Hanggang ngayon, ayaw pa rin daw niyang makita si Albie.

“Pinasasabi ko na sa mga tao, ’pag nakita niya ako, umiwas siya. Hindi siya puwedeng lumapit sa akin, baka masampal ko siya. Kasi malaki ang atraso niya sa anak ko, eh,” pahayag ni Jacklyn.

Samantala, magsisimula na sa Feb. 13 ang Valiente sa primetime slot ng TV5.