HINDI after sa rating ng show si Attorney Persida Rueda Acosta kungdi ang makatulong at magampanan ang tungkol sa public service show niyang Public Atorni: Asunto O Areglo ng TV5. Kaya naman kahit nagpalit sila ng timeslot ng Face To Face ni Amy Perez simula kahapon, Lunes, ipinagdiininan niyang walang kumpetisyon at wala silang away ng TV host-actress.

After one year sa ere on a weekly time slot, araw-araw na ang “mediation on air” program ng Public Attorney’s Office Chief. Pero walang conflict sa show nila ni Amy na halos magkapareho ng tema?

“Pareho ng batas ang ina-apply pero magkaiba ang pangyayari sa tunay na buhay. Ito po ang pagkakaiba namin… Sa umpisa pa lang ay binabawal ko na ang murahan. Bawal ang suntukan sapagkat ito po ay aura ng isang courtroom kung saan may kapangyarihan ang  aming opisina na mag-mediate. Kasi po, mula po nang ako ay umupo, mahigit kalahating milyong mediation cases ng hinawakan ng PAO,” pahayag niya at ipinakita sa video ang bilang ng mga kasong naresolba ng office niya  sa pamamagitan ng mediation.

Natanong din si Atty. Persida sa kasong namamagitan kina Annabelle Rama at Nadia Montenegro sa kung anong puwede niyang gawin nu’ng presscon na ipinatawag niya.

“Kung gusto nilang magpa-mediate sa office, ituturing kung unlimited ang services namin para maayos namin ’yan. Meron nga kaming guwapong cook sa Malacanang na imi-mediate namin ang kaso tungkol sa estate. Hingin ko muna ang approval ni P-Noy kung papa-yag ma-televise! Ha! Ha! Ha!” sagot ni Atty.

Pero nilinaw ni Atty. Persida na walang conflict sa trabaho niya ang taping ng kanyang show dahil tuwing Sabado at Linggo ang pakikipagharap niya at paggawa ng solusyon sa mga taong hindi nagkakaunawaan.

* * *

HUMAHATAW na sa ratings ang Eat Bulaga sa Mindanao nitong nakaraang linggo. No wonder, natutuwa ang namamahala sa program dahil ilang taon ding pinagsisikapan ng programa na makakuha ng malaking viewership sa parteng ’yon ng bansa.

As we all know, patuloy pa ring namamayapagpag sa ratings ang EB sa buong Maynila at karatig probinsiya. Maging sa parte ng Visayas, malaki-laki na rin ang audience share ng programa kaya inspirado ang nasa loob ng show.

Alam ng EB na sibak na naman ang katapat nilang show at merong bagong show na namang itatapat sa kanila. Pero hindi titigil ang program upang lalo pang palakasin ang programa hindi lang sa Metro Manila, Luzon at Visayas kungdi maging sa Mindanao.

Siyanga pala, sa kababayan natin sa San Francisco, California, isang pabulosong show ang handog ng EB Dabarkads sa March 31 na gagawin sa Cow Palace!

* * *

AYAW isara ni Glaiza de Castro ang pinto niya kay Dennis Trillo na leading man niya sa GMA drama na Biritera na mapapanood na sa Feb. 6 after 24 Oras.

“Basta masaya  ako sa nangyayari sa buhay ko. Kung meron mang darating, gusto ko alagaan ako eh,” rason ni Glaiza.

May mga dumarating naman ngayong mangliligaw sa young actress pero siya ang ayaw mag-commit sa isang relasyon.