BATI na nga pala talaga sina Tito, Vic & Joey at Willie Revillame matapos ang mahabang taon ng “pagpapalitan ng maaanghang na salita” dahil na rin sa programang Eat Bulaga at noo’y Wowowee ng ABS-CBN 2.      Ayon kay Senate Majority Leader Tito Sotto, pinadalhan sila ng tig-iisang bag na Louis Vuitton kamakailan ni Willie, bagay na ikinatutuwa hindi lamang ng senador, kundi pati na rin nina Vic at Joey.

“Si Vic pa ang may dala pagpasok sa Eat Bulaga. Nang tanungin namin kung kanino galing, ipinadala raw ni Willie. Sabi ko nga kay Vic, sinong Willie? Willie Revillame? Oo raw sabi ni Vic,” kuwento ni Sotto sa ilang Senate mediamen.

Hindi makumpirma ng beteranong senador kung ‘Christmas gift’ ba ito sa kanila o bahagi na ng Chinese New Year.

Sabi ng mister ng multi-awarded veteran actress na si Helen Gamboa, nagpapasalamat daw kasi sa kanila si Willie dahil tuwang-tuwa ito nang minsang i-impersonate ni Jose Manalo ang panggabing host ng TV5 Kapatid Network na Wil Time Big Time.

Hindi ba’t naging co-host pa ni Willie si Megastar Sharon Cuneta na paboritong pamangkin nina Sotto at Gamboa? So mukhang all’s well, that ends well. 

Hanggang ngayon, malapit nang pumalo sa isang milyon ang ‘hits’ ng panggagaya ni Manalo kay Willie na ini-upload sa YouTube.

Ang panggagayang ito ay nangyari noong Disyembre 17 ng nakalipas na taon nang sugurin ng EB Dabarkads sa kanilang Sugod Bahay portion ang Bgy. Doña Aurora, Quezon City.

Isang maybahay dito ang nagkamaling tawagin ang partner ni Jose na si Wally Bayola na Willie.

Sa kakulitan, inulit-ulit pa nina Vic at Jose kung Wally ba o Willie ang kanilang narinig. Ngunit ipinagdiinan ng ginang na Willie Revillame ang kanyang pinasasalamatan, bagay na pinagkatuwaan ng mga manonood, gayundin ng ng You tTube fanatics.

Ang catch dito, ginaya ni Jose ang lahat ng ginagawa ni Willie, kabilang na ang ‘mannerism’ nito na paggalaw ng balikat, pagpunas ng pawis sa mukha at pati na rin ang pagtawag ng nanay sa ginang, pagsayaw at pagkumpas sa pagpapahinto ng music.

Sa kanyang programa, pinasalamatan din ni Willie ang TVJ at sinabing isang malaking karangalan para sa kanya ang i-impersonate ng sikat na sikat na Dabarkads.

“Ang ginawa nina Vic Sotto at Joey  na ina-appreciate nila ang ating programa at na-appreciate naman din ako. Ganoon din naman ang buhay. Eh karangalan po namin na mabanggit ako ng Number 1 noontime show na undefeated, undisputed,” ani Willie.

“Saludo ako sa Eat Bulaga dahil walang personal. Kinanta pa iyong kanta ko na ‘Ikaw na nga’ ni Jose. Nagkendeng-kendeng pa, nagtantaranta pa. Lahat nag-congratulations pa. Nag-amazing pa. Lahat po ng ginagawa, nag-red white and blue, ginaya pa si Shalani. Karangalan namin na Tito, Vic and Joey at Dabarkads sa Eat Bulaga. Eh kami mababanggit ibig sabihin nu’n po, maganda ang ginagawa ng programang ito. Eat Bulaga pa,” dagdag pa ng milyonaryong host.